මට මේ කිසිත් නොදැනේ - ඒ මා රොබෝවකු වන බැවිනි.

පින්තුරය : gmv.com

රොබෝ තාක්ෂණය අද ලෝකය පුර ප්‍රචලිතය. රොබෝවරු බොහෝ දේ කරති. එහෙත් කිසිවක් බලාපොරොත්තු නොවෙති. ඒ ඔවුන් රොබෝවන් වන නිසාම පමණක් නොව ඔවුන්ට හැඟීම් දැනීම් නැති නිසාය. ඔවුට විඩාව දැනේනේ නැත. ඔවුන්ට වෙලාව ගැන අවුබෝධයක් නැත. අව්ව වැස්ස රෑ දහවල පිලිබඳ ඔවුන්ට නිනව්වක් නැත. රොබෝවරු තරහ හෝ කේන්ති ගන්නේ නැත. ඔවුන් හිනා වන්නේද නැත. ඔවුන් අඬන්නේද නැත. කොටින්ම මනුෂ්‍යයන් වන අපට ඇති කිසි ප්‍රශ්නයක් ඔවුන්ට නැත. කලක් ලෝක සත්වයා බොහෝ සෙයින් බිය වූයේ දිනක රොබෝවන් අප යටත් කර ගනු ඇති යන්නයි. ඒ ගැන බිය නොවන්න. ඒත් ඔවුන් දන්නා එක දෙයක් ඇත. ඒ ඔවුන්ට දෙන ලද උපදෙස් පිලි පැදීමයි.  කෙනෙක් කිසිම හැගීමක් දැනීමක් නැති ආකාරයට සිටින විට ඔහුව/ඇයව රොබෝවන් යයි හඳුන්වනවා මා දැක ඇත. එහෙම මිනිසුන් සිටිති. ඔවුන්ට මොංගල් යයි කෙනෙක් කියති. එහෙත් මේ මා කියන්නට යන්නේ එවැනි අයෙකු ගැන නොවේ. ලෙයින්-මසින් සැදුන, හැඟීම් දැනීම් ඇති රොබෝවෙක් ගැනය. 

බොහෝ රොබෝවන් මේඩ් ඉන් ජැපෑන්ය. එහෙත් මේ රෝබෝවා මේඩ් ඉන් ශ්‍රී ලංකාය. මට දැනෙන්නේ මගේ වටපිටාවේ අය මා රොබෝවකු සේ සලකා වැඩ කරනවා යන්නයි. මමද බොහෝ දේ කරමි. ඒ මා රොබෝවකු වන බැවිනි. එහෙත් කිසිවක් බලාපොරොත්තු නොවෙමි. ඒ මා රොබෝවකු වන බැවිනි. මට විඩාව දැනේ.  ඒ මා රොබෝවකු වන බැවිනි. මට වෙලාව ගැන අවුබෝධයක් නැත. ඒ මා රොබෝවකු වන බැවිනි. අව්ව වැස්ස රෑ දහවල මට හොඳින් දැනේ. එහෙත් එය නොදැනෙන ගානට සිටිමි. ඒ මා රොබෝවකු වන බැවිනි. මට තරහා, කේන්තියඑන්නේ නැත.  ඒ මා රොබෝවකු වන බැවිනි.ලෝකයා ඉදිරියේ මා සිනාසෙමි. ඒ මා රොබෝවකු වන බැවිනි. හොර රහසේ මා හඬමි. ඒ මා රොබෝවකු වන බැවිනි. මා කාටවත් අභියෝගයක් වන්නේ නැත. ඒ මා රොබෝවකු වන බැවිනි. එහෙත් ඔවුන්ට මා අභියෝගයක් සේ පෙනී ඇත. ඒ මා රොබෝවකු වන බැවිනි.  

 බිරිඳක් විසින් උදේට තේකක් හදා සැමියාට දෙනු  දැක ඇත්තෙමි. එවැනි අවශයතා මටද නොදැනේ. ඒ මා රොබෝවකු වන බැවිනි. බිරිඳකගේ සෙනෙහස සැමියකුට අවශ්‍ය වේ. එහෙත් සෙනෙහස මට අවැසි නැත. ඒ මා රොබෝවකු වන බැවිනි. මට වතුර එකක් ගේන්නයි බොහෝ සැමියන් තම බිරිඳට කියයි. මට වතුර අවශ්‍ය නැත. ඒ මා රොබෝවකු වන බැවිනි. බිරිඳ සැමියාගේ රෙදි සෝදා, මැද දෙයි. මට ඇඳුම් අවශ්‍ය නැත. මදින්නටද අවශ්‍ය නැත. ඒ මා රොබෝවකු වන බැවිනි. ලෙඩක් දුකක් ඇති වූ විට බිරිඳ සැමියාගේ ලඟින් සිට සුව දුක් සොයා බලයි. එහෙත් මට එවැනි දෙයක් අවශ්‍ය නොවේ. ඒ මා රොබෝවකු වන බැවිනි. බිරිඳ හා සැමියා තුරුළු වී නිදා ගනී. මට එවැනි දෙයක් අවශ්‍ය නැත. ඒ මා රොබෝවකු වන බැවිනි. බොහෝ පිරිමින්ට බිරිඳක් අවශ්‍ය වේ. එත් මට බිරිඳක් අවශ්‍ය නොවේ. ඒ මා රොබෝවකු වන බැවිනි.

ඕනෑම කෙනෙකුට තමන්ගේ හිතේ ඇඳි පෙම්වතියක් ඇත. මට එහෙම අයෙක් අවශ්‍ය නැත. ඒ මා රොබෝවකු වන බැවිනි. බොහෝ අය ප්‍රේමය පතා ලඳුන් වෙත තම අදහස් ඉදිරිපත් කරති. මට එසේ ප්‍රේම වදන් මුමුණන්නට අවශ්‍ය නොවේ. ඒ මා රොබෝවකු වන බැවිනි. මා එසේ ප්‍රේමය යැද්දත්, "මුට ප්‍රේම කරන්නට හැකිදැයි" ඔවුන් සිතයි. ඒ මා රොබෝවකු වන බැවිනි. මාද ප්‍රේමය පතා යුවතියන්ට ඇවිටිලි කලෙමි. එහෙත් "රෝබෝවෙකුට මම පෙම් කරන්න" යයි ඇය සිතන්නට ඇත. ඒ මා රොබෝවකු වන බැවිනි.රෝබෝවා පෙම් කල අය, රෝබෝවා දන්නා අය සමගම පෙමින් වේලි සිටිනු දැකීමෙන් රෝබෝවා කම්පා නොවේ. ඒ මා රොබෝවකු වන බැවිනි.

සමහරුන්ට ඔෆිස් වැඩ කරන විට ඇති වන ගැටළු වලට විසඳුම් සොයා ගැනීමට මා නිතරම අවශ්‍ය වේ. ඒ මා රොබෝවකු වන බැවිනි. එවැනි විටක ස්තුති කරන්නට අවශ්‍ය නොවේ. ඒ මා රොබෝවකු වන බැවිනි. මට අනිත් අයගේ උපකාර අවශ්‍ය නොවේ. ඒ මා රොබෝවකු වන බැවිනි. බොහෝ දෙනාගේ දුක කියන්නට මා තෝරාගෙන ඇත. ඒ මා රොබෝවකු වන බැවිනි. එහෙත් මගේ දුක කියා දෙයක් නැත. ඒ මා රොබෝවකු වන බැවිනි. අනිත් අයට බඩගිනි වූ විට අහර අවශ්‍ය වේ. එහෙත් මට එවැනි අවශ්‍යතා නැත. ඒ මා රොබෝවකු වන බැවිනි. එකට හිඳ කෑම කන විට මගේ පිඟානට කෑමක් දමන්නට අවශ්‍ය නැත. ඒ මා රොබෝවකු වන බැවිනි. තමන්ගේ සී. වී. එක මා ලවා නිවැරදි කරවා ගන්නා අය ඇත. ඒ මා රොබෝවකු වන බැවිනි. මට සී. වී. එකක් නැත. ඒ මා රොබෝවකු වන බැවිනි. ඔවුන් ටිකට් පත් ගෙන ආ විට මා මිලදී ගත යුතුය. ඒ මා රොබෝවකු වන බැවිනි. මා එවැනි ටිකට් පත් ඔවුන් වෙත ගෙන යායුතු නැත. ඒ මා රොබෝවකු වන බැවිනි. මිනිසුන්ට චිත්‍රපට ශාලාවට ගොස් චිත්‍රපට නැරඹීමට අවශ්‍ය වේ. මට එවැනි අවශ්‍යතා නැත. ඒ මා රොබෝවකු වන බැවිනි.

මා අනිත් අයගේ වැඩ කරන විට, බඩගිනි දැනිය යුතු නැත. ඒ මා රොබෝවකු වන බැවිනි. කාගෙන් හෝ අසාධාරණයක් මට සිදු විනි නම් ප්‍රශ්ණයක් නැත. ඒ මා රොබෝවකු වන බැවිනි. ඔයා අරෙහෙම කරේ ඇයිදැයි බොහෝ දෙනා මගෙන් විමසයි. ඒ මා රොබෝවකු වන බැවිනි. මා ඒවාට උත්තර දිය යුතු නැත. ඒ මා රොබෝවකු වන බැවිනි. අනිත් අයට නින්ද ප්‍රශ්ණයක් වුවාට මට එසේ නොවේ. ඒ මා රොබෝවකු වන බැවිනි. අනිත් අයට නිවාඩු අවශ්‍ය වුවාට මට නිවාඩු අවශ්‍ය නැත. ඒ මා රොබෝවකු වන බැවිනි. අනිත් අයගේ ගැටළු වලට මා ළඟ විසඳුම ඇත. ඒ මා රොබෝවකු වන බැවිනි. මගේ ප්‍රශ්න කියා දෙයක් නැත. ඒ මා රොබෝවකු වන බැවිනි. මගේ දුරකථනය අනෙක් අයට විවෘතව තිබිය යුතුය. ඒ මා රොබෝවකු වන බැවිනි. එහෙත් මා ඔවුන්ට කෝල් කල යුතු නොවේ. මැසේජ් යැවිය යුතු නොවේ. ඒ මා රොබෝවකු වන බැවිනි.  මා අනිත් අයගේ උපන්දින මතක තබා ගත යුතුය. ඔවුන්ට සුබ පැතිය යුතුය. ඒ මා රොබෝවකු වන බැවිනි. බොහෝ අයට දුරකථන අංක හොයා ගැනීමට මා අවශ්‍ය වේ. ඒ මා රොබෝවකු වන බැවිනි. සමහරුන්ට ගූගල් සර්ච් කිරීමටද මා අවශ්‍ය වේ. ඒ මා රොබෝවකු වන බැවිනි. 

කාර්යාලයේදී මා වැඩ කරමි. ඒ මා රොබෝවකු වන බැවිනි. මට ප්‍රමෝෂන් අවශ්‍ය නැත. ඒ මා රොබෝවකු වන බැවිනි. මට වැටුපක් ගෙවයි. ඒ මා රොබෝවකු වන බැවිනි. මට පඩි වැඩි වීම් අවශ්‍ය නැත. ඒ මා රොබෝවකු වන බැවිනි. මට බොහෝ අය ඉරිසියා කරති. ඒ මා රොබෝවකු වන බැවිනි. මා වලේ වැට්ටීමට බොහෝ අය උනන්දු වෙති. ඒ මා රොබෝවකු වන බැවිනි. මා මාරු කර යවයි. ඒ මා රොබෝවකු වන බැවිනි. 

ඒත් මට මිනිසකු ලෙස සලකන බොහෝ දෙනෙක්ද ඇත. ඔවුන්ට මගේ ප්‍රණාමය හිමි විය යුතුය.