Saturday, October 9, 2021

මහින්දලාගේ කැරම් බෝඩ් එක ......

 එක කාලයක් තිබුණා අපිට කැරම් ගහන්න පුදුමාකාර පිස්සුවක් හැදුන. කොච්චර ක්‍රිකට් ගහන්න කැමැත්තක් තිබුණත් ලංකාවේ නිරිතදිග කළාපයේ මුහුද අසබඩ ගමක් වෙච්ච බෙන්තොට අපිට අවුරුද්දේ වැඩි දවසක් වැහි සහිත කාලගුණයක් තිබුණේ. ඒ නිසාම වැහි දවස් වලට වගුරු බවට හෝ විල් බවට පත්වෙන අපේ ක්‍රීඩාංගන දෙක නිසා ඒ දවස් වලට හවස ගෙවා දමන්න අපිට විකල්පයක් තෝරා ගන්න සිදු වුණා. ඉතිං අපි බඩගෑවේ උඩකොටුව රජ මහ විහාරේ, ඒ කියන්නේ අපේ පන්සලට. සෝමසිරි නායක හාමුදුරුවන්ගේ අපවත් වීමෙන් පස්සේ එතැන අපේ රස්තියාදු පොළක් ගානට වැටුණේ ඉන්පස්සේ විහාරාධිපති තනතුරට පත් වුණු විමලසිරි හාමුදුරුවෝ අපි කාගේත් යාලුවෙක් තරමට හිතවත් වුණා නිසා. අපි ඉතිං ඔය කිවුව වැහි දවස් වලට පන්සලට බද ගානවා. පන්සල තියෙන්නේ කඳු මුදුනක. කළුගල් අතුරා තාර දාපු පාර දිගේ තමයි අපි පන්සලට ගාටන්නේ. මේක අංශක 45 විතර කන්දක්. දෙපැත්තේ තියෙන ලඳු කැලෑවේ තිබුණ ගඳපාන ගාල කවුරුන් හෝ පාරා තිබුණොත් මේ වැහි දවස් වල පුදුමාකාර ගඳක් ඇති වෙන්නේ. 
 
විමලසිරි හාමුදුරුවෝ අපේ නැන්දාගේ ලොකු පුතාගේ හොඳම ගජයා. දෙන්නා එකට එකතු වෙලා එල සිගරට් එක උරන්නේ. අපිට කැරම් බෝඩ් එක පාවිච්චි කරන්න ලැබෙන්නේ, උන්නාන්සේට සිගරට් එකක් නිමල් බේකරියෙන් ගෙනැත් දුන්නොත්. නිමල් බේකරියට යන්නේ පන්සල පිටිපස්සේ තියෙන, ඉස්පිරිතාලේ පාරෙන්. එතැනින් ඩික්මන් අයියලාගේ ගෙදරින් ඉවර වෙන ගුරු පාරට පන්සල පිටිපස්සෙන් ගේට්ටුවක් ඇරලා තිබුණා. ඉතිං අපේ ගම්වල බොහෝදෙනෙක් මේක ෂෝර්ට් කට් එකක් විදියට පාවිච්චි කරා ඉස්පිරිතාලෙට යන්න. දැන් වගේ දැඩි නීති රීති නොතිබුණ ඒ කාළේ බොහෝදෙනෙක් රවුමේ ගිහිං ගේට්ටුවෙන් යන්නේ නැතිව කම්බි වැටෙන් රිංගලා ඉස්පිරිතාලේ ගියා. මේ රෝහලට ගුණසේකර අනුස්මරණ රෝහල කියන නම ලැබුණේ, අපේ ගමේ එවකට හිටිය කෝටිපතියෙක් වෙච්ච ඩොනල්ඩ් ගුණසේකර මහතාගේ පරිත්‍යාගයෙන් ඉදි කරපු මේ රෝහල රජයට පරිත්‍යාග කරපු නිසා. මේ රෝහල විවෘත්ත කරන්න ඔන්න මෙන්න තියෙන කාලේ ලංකාවට කපිල වස්තුපුර සර්වඥ දාතුන් වහන්සේලා වැඩම කරවා තිබුණා. 

ඩොනල්ඩ් ගුණසේකර මහත්මයාගේ ලොකු බලාපොරොත්තුවක් තිබුණා, අපේ ගම හරහා මේ රථය ගමන් කරන විට මේ රෝහල පිටුපස ඉදි කරපු විශේෂ කපිලවස්තුපුර චෛත්‍ය ආකෘතිය ඉදිරියේ තාවකාලිකව ඉදිකරපු මඩුවක සර්වඥ දාතුන් වන්හන්සේ වැඩම කරවා ප්‍රදර්ශනය කරන්න. මමත් කලින්ම ඉස්කෝලෙන් ඇවිත් මේ පෝලිමේ ඉදිරියෙන්ම හිටියා. හදිසියේ සැරසිලි කරමින් උන්න ඩොනල්ඩ් ගුණසේකර මහත්මයාට(ඉලාස්ටෝ සමූහ ව්‍යාපාරයේ අධිපති) බ්ලේඩ් තලයක් අවශ්‍ය වුණාම, මම ගාව තිබුණ බ්ලේඩ් තලය දෙන්න ලැබීම මහ ලොකු දෙයක් වුණා මට ඒ කාළයේ. මෙහෙම සුදානම් වෙලා උන්නත්, එතැන නවත්වන්නේ නැතිවම ඒ රථය ඉදිරියට ඇදෙනවා මල්වැස්සට තෙමි-තෙමි අපි බලාගෙන උන්නා. ඩොනල්ඩ් ගුණසේකර මහත්මයා කනස්සළු ස්වභාවයකින් පිටවෙලා ගියා. 

ඔතැනින් ගිහිං තමයි අපි නිමල් බේකරියට යන්නේ. නිමල්බේකරියේ හැදෙන  පාන් සහ කෙටි ආහාර වල සුවඳ ඒ වටපිටින් ගියත් දැනෙනවා. ඉස්සර අපි හරි ආසයි හාෆ් බොයිල් බිත්තරත් එක්ක, උණු-උණු පාන් පුංචි කෑලි වලට කපලා බෙලෙක් පිඟානකට පත්තර කෑල්ලක් දාලා දෙන එක කන්න. මට ඒ කාලේ ගෙදරින් ඕවට සල්ලි ලැබෙන්නේ නෑ. කොහොමත් ආහාර වේල් තුනට අමතරව කනවානම් ගහකින් කඩා ගත්ත හෝ අහුලා ගත්ත දෙයක් තමයි. හැබැයි මගේ අත් අකුරු ලස්සන නිසා මට කියළා ලවු ලේටර්ස් ලියා ගත්තු කුමාර අතේ සල්ලි ගැවසුන නිසා ලියුම ලියලා දුන්නට පස්සේ අපි දෙන්නා යන්නේ නිමල් බේකරියට. එහෙම ගිහිං තමයි ඔය හාෆ් බොයිල් කෑම කෙරුවේ. 

පන්සලේකැරම් ගහන්න මමයන්නේ කළුතර ඉස්කෝලේ ගිහිං ඇවිත් දවල්ට කාලා හවස හතරට විතර. මේ වෙනකොට අපේ නඩේ අනික් අය එක්කෝ කැරම් ගැහිල්ල පටන් අරං, නැත්නම් හතරවෙනියා එනකං බලන් ඉන්නවා. අපේ ගේ පිටිපස්සේ ග්‍රවුන්ඩ් එක තියෙන නිසා දැනගන්න ලේසියි හවසට කෙරෙන්නේ ක්‍රිකට් ගැහිල්ලද නැතිනම් කැරම් ගැහිල්ලද කියළා. පන්සලේ කැරම් ගැහිල්ල කාලයක් කෙරීගෙන ගියා. ඒ වුණත් අපේ ඉස්සරහ ගෙදර හිටිය මහින්ද/මහේෂ් කියන අයිය මලෝ යුගලට සල්ලි ඌශ්නේ ගහලා තිබුණ නිසා කැරම් බෝඩ් එකක් අරගෙන ආවා. වැඩේ තියෙන්නේ මෙවුන් හම්බ කරන සල්ලි වලින් නෙවෙයි එහෙම කළේ. මහින්දලාගේ අක්කා රට (සුවිස්) ඉඳන් එවන සල්ලි වලින්. මේ කාලේ එයාලට වැන් එකක් එහෙමත් තිබුණා. පස්සේ මහින්දලාගේ ඉස්තෝප්පුව රස්තියාදු තිප්පලක් වගේ වුණා. අපේ අම්මා නම් කීයටවත් කැමති වුණේ නෑ, මම එතැන කැරම් ගහන්න යන එකට. මොකද එතැනට නානාප්‍රකාර මිනිසුන් ආව ගිය නිසා. අනික හැමදාම හවස් වෙත්දී මහින්දලාගේ තාත්තා දෙකක් දාගෙන් අම්මා එක්ක ජාතිය අමතන්න ගන්නවා. 

ඔහොම  ටිකක් වැඩිපුර දාගත්ත දවසක, පුටුවකට වෙලාඇලට් එකක් දාගෙන හිටිය ඊබට් නොහොත් මහින්දලාගේ පියාණෝට  ටකස් බකස් ගාන මේ සද්දෙත මල පැන්නා. ගේ පිටිපස්සට ගිහිං අලවංගුව(නාරස්සනේ) අරගෙන ඇවිත් දමලා ඇරියා කැරම් බෝඩ් එකට. එදා හවස මම ගියාම ඒක තිබුණේ මෙන්න මේ වගේ. ඉතිං මොකේදැයි දැන් වළඳන්නේ කියළා මම ආපහු ගෙදර ආවා. නමුත් ටිකක් කල්පනාවට වැටුණා මෙකට් මොකක්ද කරන පුළුවන් කියළා.

ඒත් මගේ ඔලුවට කිසිම දෙයක් ආවේ නෑ. මේ කාලයේම හන්දියේ ගාර්ජ් එකේ ටිනකරින් වැඩ කරන නිවුටන් අයියාගෙන් මම ඉල්ලගෙන තිබුණා තිනර් ටිකක්. මේ තිනර් එකට මට හම්බෙන - හම්බෙන රෙජිෆෝම් කෑලි කඩලා ඔබලා  ගම් එකක් හදාගන්න තමයි ඔහොම කළේ. ටික දවසක් යනකොට ගම් එක හරි ගියා. මගේ ඉස්කෝලේ යුනිෆෝම් එකක් ඉරිලා තිබුණා. පිට පැත්තේ හින්දා වැඩි අවුලක් තිබුණේ නෑ. මම කළේ වෙන සුදු රෙදි කෑල්ලක් ඉල්ලගෙන ආවා ටේලර් වැඩ කරන විමලවීර අයියගෙන්. එක අර ඉරුණ තැනට තියලා මේ ගං ඒකෙන් ඇලෙව්වා. වැඩේ ගොඩ. ඉන් පස්සේ ඒ ෂර්ට් එක ඉස්කෝලේ අඳින්න පුළුවන් වුණා. 

මට හිතුණා මේකටත් ඒ ගම් ඒකෙන් මොනවා හරි කරන්න පුළුවන් කියළා. පොඩ්ඩක් කිට්ටු වෙලා බැලුවම පෙණුනා මේකේ ලෑල්ලට භාවිතා කරලා තියෙන්නේ එම්.ඩී.එෆ්. (ඒ කාලේ අපි කිවුවේ තේ පෙට්ටි ලෑල්ලක් කියළා). ඊට පස්සේ මේ තේ පෙට්ටි ලෑල්ලක් හොයන මෙහෙයුම අපි දියත් කළා. මේ වගේ ඒවා ගෙවල් වල නෑ. මොකද කිලෝ පහක් විතර දාන්න පුළුවන් ඒ වගේ පෙට්ටියක් ගෙදරක තිබුණා නම් කාගෙන් හරි ඉල්ලන් ආපු එකක්. ගෙදරක් තේ කිලෝ පහක් ගන්නේ නෑ. එච්චර තේ බොන්න තරම් ලොකු පවුලක් කොහෙද තියෙන්නේ? කොච්චර තේ හදලා දුන්නත් ඒ වගේ පෙට්ටි තේ, තේ කඩවල ගන්නේ නෑ. පස්සේ කාට හරි පුළුවන් වුණා, ඒ තේ පෙට්ටියක උඩු පියන් කෑල්ලක් හොයාගෙන එන්න. 

පින්තුරය ගත්තේ : https://www.calicocraftparts.co.uk/

ඔන්න ඔය උඩින් තියෙන එක වගේ එකක් තමයි මම කියන්නේ. මේක කියවන පරණ අයටනම් මතක ඇති. මේක හොයා ගත්තත් අපි මොකක්ද කරන්නේ කියන කාරණය හිතා ගන්න අමාරු වුණා. මං මහින්දගෙන් ඇහුවා "මේක කපලා කොටලා හැදුවට කමක් නැද්ද ?" කියළා. ඌ ටිකක් කල්පනා කරළා "ඕන දෙයක්" කියළා කිවුවා. ඒක කැඩිලා තියෙන්නේ හරියට සයිප්‍රස් රට වගේ. ඒ වගේ එකක් කොහොමද මේකෙන් කපන්නේ ? ටික වෙලාවක් කල්පනා කරාම, නිවුටන් අයියලා ගැරේජ් එකේ කරන වැඩේ සිහිපත් වුණා. කොහොම දිරපු තැනක් වුණත් එයාලා හතරැස් කොටුවක් කපලා තමයි අලුත් තහඩු කෑල්ලක් තියලා වෙල්ඩින් කරන්නේ. ඉන් පස්සේ පොඩි කියත් පටියක් හොයා ගත්තා. මේක එහෙම ලේසියෙන් කපලා ඉවත් කරන්න බෑ, මොකද යටින් මේකේ ආධාරක් පටි තියෙනවා අඟලේ-අඟලේ පොලු වලින් ගහපු. අඟල් හයේ විතර පරතරයකින් ඒවා තිබුණේ. මේ කපන වැඩේ ගරාජ් එකේ ටික කාළයක් වැඩ කරපු සුසන්ත භාරගත්ත. අන්තිමට හතරැස් නැති වුණත්, ඒ වගේ එකක් කපා ගත්තා. ඉන් පස්සේ ඒක මැනලා සමාන කොටුවක් ලෑලි කෑල්ලෙන් කැපුවා. තියලා බැලුවම සමහර තැන් වල පොඩි හිඩැස් තියෙනවා මිලි මිට්ටර දෙකේ තුණේ. ඇතුලේ තියෙන හරස් පොලු වලයි-ලෑල්ලෙයි ගම් ගාලා ඇලෙවුවා. ඒ ගම් එක පට ගාලා වේලෙනවා. ඒ වගේමයි ඇලෙවුවොත් ඇලෙවුවා. 

ඊට පස්සේ අර හිඩැස් වලට ගම් එක්ක බොරික් කුඩු කලවම් කරලා පිරෙවුවා. පස්සේ වැලි කඩදාසියකි අර කැපුම් තියෙන තැන් ගෑවා. පස්සේ හොදට බොරික් දාළා ගහලා බැලුවා. මුලින්ම ගහපු පාරවල් ගියේ ඉස්සරහ හිටිය කෙනාගේ ඔලුව උඩින්. කට්ටිය හිනා වෙන්න පටන් ගත්තා. ආයෙත් ටික වැලි කඩදාසිය ඇල්ලුවා. දවස් කිහිපයක් ගියාව පොඩි පොඩි පැනිලි තිබුණා. පස්සේ හරි ගියා. ඕක තමයි මම කරපු පළමු DIY නොහොත් අටවන මාටිං වැඩේ. දැන්නම් කරන්නෙම ඒවා. මොකද යූබටයේ වීඩියෝ තියෙනවා ඕන තරම්.

Wednesday, October 6, 2021

ඕමාන් ක්‍රිකට් ප්‍රධාන විධායක නිලධාරියා : " කිසිවකුට කියන්න බෑ අපි එක් ලෝක කුසලානයක් ක්‍රීඩා කොට අතුරුදහන් වෙනවා කියළා"......

සංවාදය : 


තම රට තරගාවලිය සඳහා සම සත්කාරකත්වය දැරීමත් සමග විස්සයි20 ලෝක කුසලානය,

 ඕමාන් ක්‍රිකට් ප්‍රධාන විධායක පන්කජ් කිම්ජිගේ විශ්වාසය මෙම තරගාවලිය සඳහා දෙවන 

වරටත් ඉදිරිපත්වන ඕමානය ප්‍රබල තරගකරුවෙක් වනු ඇති බවයි. 


පින්තුරය : ESPN Crickinfo වෙබ් අඩවියෙනි
දශකයකට ප්‍රථම ඕමානය සතුව තණකොළ සහිත ක්‍රීඩාංගනයක් නොතිබුණි. අද එකකට එකක් යාබදව ක්‍රීඩාංගන දෙකක්, එහි අගනගරය වන මස්කට් නුවරට, කෙටි ගමනකින් ලඟා විය හැකි අල් අමරත් හී තිබේ. මෙම ස්ථාන දෙක, විස්සයි20 ලෝක කුසළාන තරගාවලියේ පළමු අධියරෙහි තරග 6ක් සඳහා සත්කාරකත්වය දරන විට,  ලෝක ක්‍රිකට් සිතියම තුළ ඔවුන් රඳවනු ඇති. ඕමාන ජාතික කණ්ඩායම තරගාවලිය සඳහා සහභාගී වීමෙන් එහි සුපිරි 12 වටයට ඇතුලත් වීමට බලාපොරොත්තු වීමත් සමග, එය රටෙහි ක්‍රිකට් වල සංදිස්ථානයක් සනිටුහන් කරන මොහොත වන බව පුළුල්ව දකින බව එහි ප්‍රධාන විධායක නිලධාරී පංකජ් කිමිජි පවසා සිටිනවා.


ලෝක කුසලානය සඳහා සත්කාරකත්වය දක්වන්නට ලැබීම ඔමානයට කෙතරම් විශාල දැයි යන්න ගැන දැනෙන හැඟීම ගැන විස්තරයක් දිය හැකිද ?


අයිසීසී ආශ්‍රිත සාමාජිකත්වය දරන දේශයකට ලෝක කුසලානයකට සත්කාරකත්වය දරන්නට 

නිතරම අවස්ථා හිමි වෙනවාද ? ස්ටාර් පොර්ට්ස් [තරගාවලියේ නිළ විකාශකයා ] මා හා පැවසුවා 

මුළු ඉතිහාසයේම සිදු කෙරෙන, තෙවන විශාලතම රූපගත කර විකාශණය කරන ක්‍රීඩා තරගාවලිය 

බව. එය බිලියන 3ත් 3.5 ත් අතර ප්‍රමාණයක සැඟවුණු ප්‍රේක්ෂණ ජනතාවක් වෙත ලඟා වන බවත්, 

ඕමානයේ ක්‍රීඩා කරන මුල් තරග 06 අඩුම තරමින් ඉන්දීය උප මහාද්වීපය තුළ බිලියනක පමණ 

නැරඹුමක් සිදු වුවහොත්, එය ලොකු දෙයක් බව. මීට කලින් එහෙම වෙලා නෑ. අපිට ගොඩක් 

සන්තෝෂයි ඒ ගැන. දේශීය නාගරික සභාවේ ප්‍රධානියාගේ සිට අපට රට තුළ තිබෙන සියළුම 

අධිකාරීන්ගේ ආශිර්වාදය සහ සහයෝගය ලැබෙනවා, ඔවුන් පවසා සිටින්නේ “අපි ඕමානය ලෝක 

සිතියමේ රඳවමු" යන්නයි.


ඕමාන කණ්ඩායමේ සහභාගීත්වය ගැන සහයක සේවා කණ්ඩායම සිටින්නේ මොන වගේ මානසික තත්ත්වයකද ?


කාරණා දෙකක්. එක, ලෝක ප්‍රේක්ෂකයා ඕමානය දකින්න යනවා. අවසන් විස්සයි විස්ස ලෝක 

කුසලානයේදී [ඉන්දියාවේ 2016 පැවති] අප අයර්ලන්තය පරාජය කරමින් ඉතිහාසයට යමක් එකතු

 කළා. දැන් බොහෝවිට විස්සයි20 ලෝක කුසලානයේ දෙවෙනි වටය සඳහා සුදුසුකම් ලබන 

ආසියාවේ එකම ආශ්‍රිත සාමාජික රට විය හැකියි. එය අහම්බෙන් ලැබුණු වාසියක් නොවෙයි.


දෙක; අපගේ අභිප්‍රාය, අප අර්ථ ගන්වාගෙන තිබෙනවා. සුදු පාට බෝලයෙන් ක්‍රිකට් ක්‍රීඩා කරන

 මුල් රටවල් 20 අතර අප ඉන්නවා. කාටවත් කියන්න බැහැ, එක් ලෝක කුසානයක මෙම ස්ථානය 

ලබාගෙන අප අතුරුදහන් වේවි කියළා අපගේ බලාපොරොත්තුව සුපිරි 12 වටයට සුදුසුකම් ලැබීමට.

 කණ්ඩායම ඒ සඳහා සිත යොමුකර තිබෙනවා. එය කරන්න හැකියාව ලැබුනොත් අපට ස්වයංක්‍රීයව

 ලබන වසරේ ඕස්ට්‍රේලියාවේ පැවැත්වෙන විස්සයි20 ලෝක කුසලානය සඳහාත් සුදුසුකම් ලබනවා.

 එනිසා ලොකු අභියෝගයක් තිබෙනවා. එක්වරම සම්පුර්ණයෙන්ම පාපන්දු ක්‍රීඩාවට ප්‍රේම කරන

 ජනතාවක්, තුළන් අලුත්ම කණ්ඩායමක් බිහි වේවි, ඔවුන් කියාවි ඔමානයට ලෝක කුසලානයක් 

ගෙන ඒම විශ්මිත දෙයක් බව.


මෙම කෝවිඩ් කාලයේ, තරග පැවති කාළය ගැන මතකය පවා ගිලිහෙන තත්වයක කොහොමද ඔබ මෙම තරගාවලිය සඳහා පෙර සුදානම සිදු කළේ ?


ඕමානයේ අප සතුව සිටින සියළුම ක්‍රිකට් ක්‍රීඩකයින් ආධුනිකයින්. අප සති අන්ත ක්‍රිකට් ක්‍රීඩා 

කරනවා අපගේ දේශීය ක්‍රිකට් සමය සැප්තැම්බර් සිට අප්‍රේල් දක්වා සති අනත තරගාවලි වලින් 

සමන්විත වෙනවා. සති පහක-හයක කාලයකට කලින් අපගේ සියළු ක්‍රීඩකයින් නිරෝධායනකින් 

පසුවයි පැමිණියේ. මේ කාළය තුලදී, ශාරීරික පුහුණුකරුවන් ඔවුන්ව නිසි හැඩයකට ගන්නට සමත් 

වී තිබෙනවා. ඔවුන්ගේ වැඩි වී තිබු කිලෝ කිහිපයක් බර අඩුකරගෙන තිබෙනවා. එයින් 

පැවසෙන්නේ කණ්ඩායම සුපිරි හැඩයක සිටින බව.


අප මුම්බායි වල ඉතා හොඳ විස්සයි20 තරගාවලියක් ක්‍රීඩා කළා 2-1 ක් ලෙස ඔවුන පරාජය කරමින්. 

තරගාවලියෙන් පසුව රාත්‍රී භෝජන සංග්‍රහයකදී, මුම්බායි පුහුණුකරු අමෝල් මුසුවදාර් මා හා 

පැවසුවා “ඔබ ගිනිගොඩ අවුළුවාගන්න සමත් වුණා [මුම්බායි කණ්ඩායම සමග] මටවත් එය කරන්න 

බැරි වුණා” විස්සයි20 තරගාවලියේදී ලැබූ පසුබැස්ම, මුම්බායි කණ්ඩායමට එක්දින තරගාවලියේදී 

පැහැදිලි ජයක් වාර්තා කරන්නට හේතු වන්නට ඇති, නමුත් අපට මුම්බායි වගේ ඉස්තරම් 

කණ්ඩායමක් සමග ක්‍රීඩා කරන්නට ලැබීම තරම් වටිනා පුහුණුවක් තවත් නැහැ. ප්‍රබල ප්‍රතිවාදියෙකු 

සමග පහුණු වනවිට ඔබ ඉගෙන ගන්නවා. දුර්වල ප්‍රතිවාදියා සහය වන්නේ තවතවත් ලිහිල් 

වන්නටයි. අවුරුදු 22-23ක් අත‍ර සාමාන්‍ය වයසක පසුවන ප්‍රතිවාදී කණ්ඩායමක් සමග ක්‍රීඩා 

කළ අපගේ කණ්ඩායමේ සාමාන්‍ය වයස වුණේ 33-34ක් අතර. එය ඇත්ත වශයෙන් යොවුන් 

කණ්ඩායමක් සහ ප්‍රවීනයන්ගේ අතර තරගයක් වගෙයි. සුදානම අනර්ඝයි.

Mumbai Crkcket Team
පින්තුරය : ESPN Crickinfo වෙබ්අඩවියෙනි

 


ඔබගේ ක්‍රිකට් අධ්‍යක්ෂ වරයා, දුලිප් මෙන්ඩිස් ගැන යමක් සඳහන් කරන්න. කණ්ඩායම වෙත ඔහුගේ බලපෑම කොහොමද ?


ඔහු දැන් අප සමග වසර 10ක කාළයක් ගතකර තිබෙනවා. මම හිතන්නේ නැහැ ඔහු හිතුවා කියළා 

මේ තරම් කාලයක් මෙහි රැඳී ඉන්න. ඕමාන් ක්‍රිකට් හැඩගන්වන්න ඔහු ලැබීම් ආශිර්වාදයක්. 2016 දී

 විස්සයි20 ලෝක කුසලානය සඳහා සුදුසුකම් ලැබීමේ සිට, ශ්‍රේණිගත කිරීම් වල 40 වන ස්ථානයේ 

රැඳී සිටි අපි 14වන හෝ 15වන ස්ථානය දක්වා ඉහළ ගමන් කළා සුදු පැහැති පන්දුවෙන් කරන ක්‍රිකට්

 වලදී. එයට වඩා දෙයක් අපට ඉල්ලා සිටිය හැකිද ? ඔහු පියවරෙන් පියවර එය ගොඩනැගුවා.


ලෝක කුසලාන ලීගය 2023 එක්දින ක්‍රිකට් ලෝක කුසලානය සඳහා සුදුසුකම් ලැබීමේ මාර්ගය වී 

තිබෙනවා, මුළු තරග ප්‍රමාණයෙන් තුණෙන් එකක් දැන් ක්‍රීඩා කර හමාරයි. අප ලකුණු සටහන් වල 

ඉහළින් රැඳී ඉන්නවා. මගේ සගයන් සමග මා පවසන දේ තමයි, “අපි ක්‍රිකට්  වලට අතපෙවීමෙන්  

වැළකෙමු. අප එය දුලිප්ට කරගෙන යාමට ඉඩ හරිමු” කියළා.  අප මෙහි පාලකයින් පමණයි. අප 

මේ රේඛාව ඇඳ, ඔහුට ක්‍රිකට් කරගෙන යාමට ඉඩ හැරිය පසු, එය අතිවිශාලයි. ක්‍රිකට් කියන්නේ 

එක දිගට තරග පහක් පරාජය වුවහොත් කළමනාකරු ඉවත් කරනා, පාපන්දු වගේ විවේචනාත්මක 

ක්‍රීඩාවක් නෙවෙයි, පාරජයයන් යනු එහි කොටසක් සහ වර්ධනය වෙනුවෙන් ලැබෙන පාර්සලයක්. 

වාසනාවකට, [අවසන් පස් වසර තුළ] අප ජයගත් තරග පරාජයට පත්වූ තරග වලට වඩා වැඩියි. 


දක්ෂයන්ට තැන ලබා දීම සඳහා පෝෂක පද්දතියක් තිබෙනවද ? 


අප සතුව මෙහි අපූරු පාසැල් පද්දතියක් තිබෙනවා එසේම දැනට සිටින ක්‍රීඩකයින්ගෙන් සිවු 

දෙනෙක් ජාතික කණ්ඩායම දක්වා පැමිණ තිබෙන්නේ 13න් පහළ, 16න් පහළ සහ 19න් පහළ 

ක්‍රීඩා කිරීමෙන් පසුව. ඉන්දියන් සහ පාකිස්තාන, පාසල් ක්‍රිකට් පද්දති මෙහි ඉතා ශක්තිමත් අතර 

අප තවදුරටත් එය ශක්තිමත් කිරීම සඳහා උත්සාහ ගනිමින් සිටිනවා. අපගේ ක්‍රීඩකයින් දේශීව 

වගා කෙරුණු, සහ විදේශිකයන් අතර සම්මිශ්‍රණයක්. තමන්ගේ රටවල ඉහලට පැමිණීමට අවස්ථාව

 නොලද අය දැන් සලකා බලන්නට ඉඩ තිබෙනවා ඕමානය ඔවුන්ගේ ආශාව පසුපස ලුහුබැඳීමට 

කදිම ස්ථානයක් කියළා.


අප 2020දී බිම් මට්ටමේ සංවර්ධන වැඩසටහනක් දියත් කළා [කෝවිඩ් පැමිණෙන්න කලින්]. අප 

රජයේ පාසල් 10ක වගකීම භාරගත්තා, අපගේ පුහුණුකරුවන් අවුරුදු 8-9 වයසේ සිසු-සිසුවියන් 

සඳහා ක්‍රීඩාවේ මුලික දේ ඉගැන්වීමෙන් යෙදුණු අතර ඔවුන්ට එය ඊළඟ මට්ටම දක්වා ගෙන යා 

හැකිදැයි බැලුවා. අපගේ ප්‍රධාන ක්‍රීඩාංගනයට ඔවුන් රැගෙන විත්, ඔවුන්ට ගෘහස්ථ මධ්‍යස්ථානයේ 

පුහුණුවීමට ඉඩ ලබා දුන්නා. අප උත්සාහ කළේ එය විනෝදාත්මක ස්ථානයක් බවට ඔවුන්ට පුරුදු 

කරන්න. ඔවුන්ට ක්‍රිකට් නැරඹීමට අවස්ථාවක් ලැබෙන්නේ නෑ, එනිසා හැකිතාක් ඔවුන්ට ක්‍රීඩා 

කිරීමේ අවස්ථාව ලබාදීම සහතික කර ගත්තා. අල් අමරත් හි ප්‍රධාන ක්‍රීඩාංගනය ආසන්නයේ 

හොඳ නෙවාසිකයින් පිරිසක් සිටිනවා. අප ඔවුන්ට සන්ධ්‍යා කාළයේ ශරීර සුවතාව සඳහා ඇවිදීමට 

අවස්ථාව සලසා දුන්නා, තණකොළ පිට්ටනියේ ව්‍යායාම සඳහා ඉඩ හැරියා. තවත් අවුරුදු 10-15 

කාලයකදී 50%ක් පමණ ඕමාන ජාතිකයින් කණ්ඩායමේ සිටිනු දකින්නට අපට කළහැකි දේ අප 

කළා. 

Oman Cricket Team Streaching Al Amarath Streaching
පින්තුරය : ESPN Cricinfo වෙබ් අඩවියෙනි.

 


කොපමණ කාලයකට පෙරද සිට ඔබ සිතුවේ ඕමාන ක්‍රිකට් ක්‍රීඩාව වෘත්තීය මට්ටමට පත් වේවි කියා ?


වඩාත් යථාර්ථවාදීව අර්ධ-වෘත්තීය මට්ටමේ ව්‍යුහයක් පවත්වාගෙන යනවා. අපගේ සියළුම 

ක්‍රීඩකයින් උදේ 9ත් හවස 5ත් අතර රාජකාරියක් කරනවා. ඔවුන්ට තාමත් පුහුණු කඳවුරු හෝ 

විශාල තරගාවලි සඳහා නිවාඩු ලැබෙන්නේ නෑ. සමහර ක්‍රීඩකයින් අර්ධ-දෙමුහුන් කොන්ත්‍රාත් මත 

සිටිනවා, නමුත් ඔවුන්ව බඳවාගත් ආයතනය වෙනුවට ඕමාන් ක්‍රිකට් වෙතින් වැටුප් ගෙවනවා

[ඔවුන් රාජකාරි වෙත වාර්තා නොකළ අවස්ථා වල]. අවංකව අපි තවමත් ආධුනිකයින්, එනමුත් 

කුඩා කණ්ඩායම් නිරතුරු පරදවනවාට වඩා ඉඳහිට හෝ ඉහළ ශ්‍රේණිගත කණ්ඩායම් පරාජයට 

පත් කරනවා, ඔබට සම්පූර්ණ වෘත්තීය මට්ටමේ කණ්ඩායමක් නිර්මාණය කරන්න බැහැ,  

කණ්ඩායමේ වැඩේ දෙනෙක් විදේශිකයන් වූ විට. එය හරි යන්නේ නෑ.


මෙවැනි විශාල මට්ටමක තරගාවලියක් සඳහා විශාල මට්ටමක යටිතල පහසුකම් නවන්න සිදු වනවා, ඔබ එය සිදු කලාද ?

 

අපේ ක්‍රීඩාංගනය [අල් අමරත් වල] හරියට, වර්ණනාවට නගන එංගලන්තයේ ගම්බද ප්‍රදේශයක 

ක්‍රීඩාංගනයක් වගෙයි. එක් පැත්තක ක්‍රීඩා සමාජයේ ශාලාවක් තිබුණා, එය මුම්බායි  සී.සී.අයි. 

එකෙන් තුණෙන් එකක් විතර ඇති. එහි අනෙක් කොටස කොහොඹ සහ මැයි ගස්, ලන්ඩනයේ 

මල්වතු වල ඇතිවාක් මෙන් දෙදෙනෙකු හෝ තිදෙනෙකු වාඩි වී සති අන්ත තරගය නරඹන්න 

ඇති බංකු වගේ කොටසක්.  


නමුත් ලෝක කුසලානය සඳහා සත්කාරකත්වයත් සමග අපට එය වෙනස් කරන්න සිදු වුණා. 

අපිට සිදු වුණා සැලසුමක දල සටහනක් ඇඳ ගන්න, කී දෙනෙකුට තරග නරඹන්න අවසර 

දෙනවාද ? කෝවිඩ් නීති-රීති සමග, අප පැවසුවා 3000ක් පාළනය කළ හැකි බව. අපි පිට්ටනියේ 

බංකු වල 200ක් 300ක් අතර ප්‍රමාණයකට ඉඩ ලබා දිය හැකියි, දැන් අපි 3000කට නරඹන්න 

දෙන්න සුදානම්.


වායුසමනය කළ ඒකාබද්ධ නැරඹුම් කුටි 30ක් සහ මාධ්‍ය කුටියක් දර්ශණ තිරයට ඉහළින් ගොඩනැගුවා. 

එක් විස්තර විචාර කුටියක් ප්‍රමාණවත් නැහැ. දැන් අපි භාෂා කිහිපයකින් විස්තර විචාරයන් කරනවා. 

එනිසා ඒ සඳහා අපට විශාල ප්‍රදේශයක් සංවර්ධනය කරන්න සිදු වුණා. මට කියන්න බැහැ අපිට 

ලෝර්ඩ්ස් තරමේ මාධ්‍ය කුටියක් තිබෙනවා කියා, නමුත් අපිට කදිම පුංචි සැකසුමක් තිබෙනවා. 

අපට දැනුම් දුන්නා ලක්ස් 1000ක පමණ විදුලි ආලෝක ධාරා ඉස්සර තිබුණ ක්‍රමය බව. ඔබට 4K HD 

රූපගත කිරීමට අම අවම වශයෙන් ලක්ස් 3500ක වත් ආලෝක තත්වයක් පැවතිය යුතුයි. අපට දැනුම්

 දුන්නා ලෝහ හැලයිඩ් විදුලි ආලෝකය යොදා නොගෙන ඒ වෙනුවට එල්.ඊ.ඩී. ලාම්පු යොදා ගන්නා 

ලෙස. එවැනි විදුලි පහන් ඇඟිලි තුඩකින් දැල්වීම හෝ නිවා දැමීම සිදුකල හැකියි. ඉතිං අපි ඒකත් කළා. 


එකින් එක සැමදේම දැන් සුදානම් කර තිබෙනවා. එය තරග හයක් පමණක් වුවත්, මෙය ලෝක 

කුසලානයක්. ඉතිං මේ උද්යෝගිමත් කාලයක්. 


සාකච්ඡාව: ESPN Crickinfo වෙබ් අඩවියේ උප කතෘ වරයෙකු වන ශෂන්ක් කිෂෝර්, ඕමාන ක්‍රිකට් ප්‍රධාන විධායක වරයා වන පන්කජ් කිමිජි සමග කළ සම්මුඛ සාකච්ඡාවක් එම වෙබ් අඩවියේ 2021 ඔක්තෝබර් 03 දින පළවූ ලිපියක සිංහල පරිවර්තනය.

Monday, May 31, 2021

තායිලන්තයේදී කළ කාළ කළමනාකරණය ...... Time Management during Bangkok Tour ......

 මා ලිවිය යුත්තේ කුමන මාතෘකා ඔස්සේදැයි මුහුනුපොතෙහි මාගේ පිටුවෙන් කළ විමසීමෙදී මගේ මිත්‍ර සුභාෂ් හෙවාවිතාන ඉල්ලා සිටියේ සංචාරක සටහන් පිලිබඳ සටහන් කියවීමට කැමති බවයි. මින් අදහස් කරන්නට ඇත්තේ විදෙශයන්හී සිදුකළ සංචාරක සටහන් බව මා විශ්වාස කරනවා. මා කළ බොහෝ සංචාර වලදී ඔහුත් එකතු වී තිබෙනවා. අපගේ පළමු බැංකොක් සවාරිය, සිංගප්පුරු සවාරිය, මැලේසියා සවාරිය සහ දෙවන බැංකොක් සවාරියේදී අප දෙදෙනාම එකට එකතු වුණා. ඉන් පසුව අප දෙදෙනාට වෙන වෙනම සවාරි වලට සහභාගී වන්නට සිදු වුණා ඒ ඔහුට රාජකාරිය පදනම්ව බොහෝ අවස්ථා හිමි වුවද, මා කළේ ක්‍රිකට් සම්බන්ධව සිදු වූ සවාරි වීමයි. 

 අවසන් වරට අප දෙදෙනා එක්ව කළ සංචාරය දෙවන වරට බැංකොක් හී කළ සවාරියයි. අප දෙදෙනා ජනසතු සේවා තරගාවලි වලදී දැක්වූ දක්ෂතා පදනම් කොට ගෙන ඒ සඳහා නම් කෙරුණා. මෙවැනි සංචාර බොහෝ සුඛෝපභෝගී ඒවා යයි සිතනවානම් එය මුලාවක්. බොහෝවිට මේවා බජට් මට්ටමේ සංචාරයි. ගුවන් ටිකට් පත, විදේශයන්හී වියදම, වීසා ගාස්තු සහ තරග සඳහා අවශ්‍ය වෙනත් වියදම් එකතු වූ විට බොහෝ අවස්ථා වල රුපියල් ලක්ෂයක් ආසන්නයට මේ වියදම් වල එකතුව ලඟා වනවා. ඉතිං අපගේ ආයතන වළින් මේ සඳහා ගෙවනු ලබන්නේ අදාළ චක්‍රලේඛ වලට අනුකූලවයි. එවැනි විටෙක ක්‍රීඩකයාට හෝ නිලධාරියාට පුද්ගලිකව යම් වියදමක් දැරීමට සිදු වනවා. එහිදී නෑසිය හිත මිතුරන්ට සහ අපහට අවශ්‍ය දේ මිලදී ගැනීම සඳහා තවත් රුපියල් ලක්ෂයක් වත් අත තබාගෙන යාම එකළ අපේ පුරුද්දයි. නමුත් මා අවසන් වරට කරන ලද සවාරි වලදී තේරුම් ගත්තේ සැහැල්ලුවෙන් එම කටයුතු වලට සහභාගී වීමට නම් අවම වශයෙන් රුපියල් ලක්ෂ තුනක්වත් අවශ්‍ය වන බවයි. නැතිනම් කොත්තු මී වැනි පහසුවෙන් සකසා ගතහැකි ආහාර ලංකාවෙන් එහි ගෙන යා යුතුය. සමහරුන් මාළු ඇඹුල් තියල්, සීනි සම්බෝල, පොළොස් ව්‍යංජන පමනක නොව හිස්ව ගෙන යන ලගේජය පුරවා පෙති කපන ලද පාන් පවා රැගෙන යන බව නොරහසකි. එසේ යන බොහෝ අය ෆීලින් ෆැන්ටාස්ටික් යනුවෙන් සෙල්ෆි ගසා මුහුණු පොත සැරසීම වෙනත් කාරණයකි. මෙවැනි අවස්ථා වලදී අනුන්ගෙන් යැපෙන පුද්ගලයින්ද අපට එමට හමු වී තිබේ. විදේශ සංචාරයකදී බොහෝ විට තමන්ගේ වියදම් තමන්ම දරා ගත යුතුය. මේ සංචාර වලට සහභාගී වූ පසුව මා සිත තුළ අපේ ආයතන වල සේවයට පැමිණෙන විදේශිකයන්ගේ හැසිරීම ගැන තිබූ, කුකුසක් නිරාකරණය කර ගැනීමට හැකි විය. ඔවුන් බස් එකකට ගොඩ වූ විට සල්ලි එකතු කර ටිකට් මිලදී ගනියි. එවැනි විටෙකඅප ඉදිරිපත් වී ඒ මුළු මුදල ගෙවා දැමුවත්, ඔවුන් වහා එය ආපසු අපහට ලබා දීමට උත්සුක වෙයි. නමුත් ඉන්දියානුවන් නම් ඊළඟ දිනයේත් අපෙන් ගෙවීම කරගැනීමට බලා සිටියි. මැලේසියානුවන් ඒ අතින් කෙනකුට කරදර කරන්නට කැමති නැත. අපද විදෙස් ගතවූ විට අපේ විය හියදම් වෙන වෙනම කර ගැනීමට වග බලාගන්නා විටෙක පෙරකී හැසිරීමට හේතුව පසක් කර ගන්නට හැකි විය. 

 
එම සංචාරය මා අවසන් වරට ක්‍රීඩකයෙකු ලෙස ලැබූ සවාරියයි. ඉන්පසු ජනසතු සේවා ක්‍රිකට්සංගමයේ කමිටු සාමාජිකයෙකු වූ පසු සහභාගී වුයේ නිලධාරියෙකු වශයෙනි. ඉන්පසුව මගේ ආයතනයේ ක්‍රීඩකයින් සමග එම ගමන් වලදී එකට ගත කිරීමට ලැබෙන කාළය සීමිත විය. මන්ද නිලධාරියෙකු වශයෙන් සහභාගී වනවිට අප දැරිය යුතු නිශ්චිත වගකීම් රැසක්ද වන නිසාය. මේ සංචාරයේ තතු එය අවසන් කළ විගස මගේ බ්ලොග් අඩවියට සටහනක් ලෙස එකතු කළා. නමුත් අද උදෑසන රුපවාහිනි නාලිකාවක දුටු දෙයකින් එම සටහනට මා එකතු නොකළ කාරණයක් සිහිපත් වුණා. එවැනි සංචාරයක අවසන් දිනය ඕනෑම සංචාරයකදී කාර්යබහුල අතින් දෙවන වනවානම් පිටත් වන දිනට පමණක්ම වේ. මේ සංචාරයෙදීද එය එසේම විය. එවැනි දිනක පාන්දර අවදි වීම මගේ පුරුද්දක් වුවද එදිනට මා හට අවදි වන්නට හේතුවක් නොවිණි. මන්ද පෙරදා රාත්‍රියේ කරගෙන ආ සංවාදයක් අවසන් වුයේ උදෑසන හයට පමණය. එය සිදු වුයේ ඉංජිනේරු සංස්ථාවේ චාලුක සහ චමිල් සිටි කාමරයේය. එයට එකතු වූ අනෙක් පුද්ගලයන්අකාලයේ  වුයේ වරාය අධිකාරියේ දක්ෂ ක්‍රිකට් ක්‍රීඩකයෙකු වූ, අප අතරින් වියෝ වූ ලසන්ත සහ නාගරික සංවර්ධන අදිකාරියේ සුදර්ශන යන අයයි. එදින මේ අය ජනසතු සේවා ක්‍රිකට් සංගමය ඉහළ නැංවීමට නම් කලයුතු යෝජනා බොහොමයක් ඉදිරිපත් කළහ. මා ඒවා හොඳින් සිහියේ තබා ගත්තේ, ඉන් පසුව එළැඹෙන මහ සභාවේදී මගේ නම සංගමය වෙත ඉදිරිපත් කිරීමට මහජන බැංකුවේ ක්‍රීඩා සමාජ ලේකම් අජිත් රත්නායක මහතා මා සමග සාකච්ඡා කොට තිබූ බැවිණි. එයට අමතරව සය සාමාජික ක්‍රිකට් තරගාවලියේදී මා ස්වේච්ඡාවෙන් ඉටු කළ සේවය දැක සංගමේ ලේකම් උදය ඉමල්ෂ මහතාගෙන්ද විවරණ ලැබී තිබුණි. එනිසා ප්‍රමුඛ ක්‍රීඩකයින් කිහිප දෙනෙකු විසින් ඉදිරිපත් කළ මෙම අදහස් තරයේ සිහියේ තබා ගතිමි. 
 
  ඉන් පසු චමිල් විජේවර්ධන මගෙන් ඇවිටිලි කළේ රාත්‍රී වෙළඳ පොලට ගොස් ඔහුගේ මවට සහ නැන්දනියට ඇඳුම් කිහිපයක් මිලදී ගැනීමට අවැසි බැවින් ඔහුත් සමග එකතු වන ලෙසය. මා හැරෙන්නට එම සංචාරයට කලුතර පාසලකින් අධ්‍යාපනය ලැබූ කෙනෙකු සහභාගී වූවානම් ඒ චමිල්ය. ඉතිං ඒ ඉල්ලීම අහක දැමීමට නොහැකිව මා ඔහුත් සමග මාර්ගයට පිළිපන්නේ තදින් දැනෙන නිදිමත අමතක කර දමමිනි. නමුත් ඔහු පොලෙහි ඇඳුම් තෝරන විට මට හිටගෙන නින්ද යන තත්වයට පත් වී තිබුණි. පැයක පමණ කාළයක් කෙසේ ගෙවුනාදයි මට අදටත් විස්තර කළ නොහැක. මෙවැනි සංචාර වලදී නිදා ගත්තානම් ඒ පැය කිහිපයකි. විවිධ ආයතන වලින් එක් වන මිතුරන් සමග අල්ලාප සල්ලාපයේ යෙදීම මටනම් විනෝදාශ්වාදයක් ලබා දෙයි. නමුත් සමහරුන්ට රෑ දහය පහුවන විට නිදි දෙව්දුව පළමු සිහි කැඳවුම ලබා දෙයි. මේ අයුරින් එකා-දෙන්නා සංවාදයෙන් ඉවත් වෙයි. අප එදා දින කළ සංවාදය වරායේ ඉන්දික  හඳුන්වන්නේ බාප්පාගේ මළගෙදර යනුවෙනි. උන්පන්ගෙයි විහිළුකාරයෙකු වන වරායේ ඉන්දික ගැන මෙවැනි සටහනක කෙටි සඳහනක් කර විස්තර කළ නොහැකිය. ඔහු ගැන ලියනවානම් පොස්ට් දෙකතුනක තොරතුරු තිබේ. අවසන් දිනයේ මගේ කාලසටහන සෙසු සියළුදෙනාට වඩා කාර්යබහුල එකක් විය. අප පිටත් වීමට නියමිත වෙලාව පස්වරු එක බව පෙරදින පැවති කණ්ඩායම් රැස්වීමේදී දැනුම් දී තිබුණි. අප නවාතැන් ගත් ෆස්ට් හෝටලය ආසන්නයේ ඇති නේපාල ජාතිකයින් පවත්වාගෙන යන ටේලර් සාප්පුවෙන් දිනයකින් නිමවා දෙන්නට පොරොන්දුව මත ඇණවුම් කළ ෆුල් සුට් එක ලැබෙන්නේ හරියටම 12:45 ටය. එය ලබා ගැනීමට තිබෙන අන්තිම වෙලාව එයයි. තායිලතයෙන් ලාභයෙන් ලබාගත හැකි දේ අතර මෙම ෆුල් සුට් එක් අයිතමයක් බව මා හා පැවසුයේ, එකළ ප්‍රබල ඇමති වරයෙකු වූ අනුර ප්‍රියදර්ශන යාපා මහතාගේ නෑනා විසිනි. එනිසා මේ සංචාරයේදී එසේ ඇඳුමක් මසාගන්නා අරමුණක් පැවතියත්, යම් රටකට ගොඩබට සැණින් එවැනි වියදම් නොකිරීම සාමාන්‍යයෙන් කාගේත් සිරිතයි. සියළු කටයුතු සම්පූර්ණ කිරීමෙන් පසුව මා ඒ සඳහා ඇණවුම ලබා දුන්නේ එනිසාය. නමුත් එදින උදෑසනම අප සියළුදෙනා තොරතුරු තාක්ෂණ සුපිරි වෙළඳ සංකීරණයට යාමට කථිකා කරගත්තේ එහි ගොඩබට මුල් දිනයේදීමය. මෙවැනි ගමන් වලට සුභාෂ් සහ මා අනිවාර්ය කර ගන්නේ, අප තොරතුරු තාක්ෂණ අංශයේ රැකියා කළ නිසාය. මගේ මතකයේ හැටියට අජිත්ට ඉන්ක්ජෙට් වර්ගයේ ප්‍රින්ටරයක් මිලදී ගැනීමට අවශ්‍ය විය. බ්‍රයන් කුමක් හෝ මිලදී ගත්තා වගේ මතකය. 
 
 මේ හැම මොහොතකම මා කාළය ගත කළේ නිදි විකාරයෙන්ය. අජිත් මා කිහිප වතාවක් හෝටලයට හරවා යැවීමට උත්සාහ කලද මම ඒවා ප්‍රතික්ෂේප කරමින් එහි රැඳී සිටියෙමි. අප බැංකුවේ කණ්ඩායමම ඒ සඳහා එක් වී සිටීම එයට හේතුවයි. එහෙත් ඔවුන් එම මිලදී ගැනීම් අහවර කර යාබද වෙළඳ සංකීර්ණයටද යාමට හදිසියේ තීරණය කළහ. මාද නින්දෙන ඇවිදින නියායෙන් එහි ගමන් ගත්තේ හිස් දෑතිනි. ඔවුන් ඇවිද අවසන් කර 11:30 ට පමණ එහි ද්වාරය අසල හමු වන පොරොන්දුවෙන් කණ්ඩායම් වලට වෙන් වී ගමන් ගන්නට කථිකා කර ගත්හ. 
 
පින්තුරය ගත්තේ : https://www.lifestyleasia.com

මාද කණ්ඩායමෙන් මිදුන මොහොතේ වටපිට බැලුවෙමි. එහි පේෂල් කරන තැනක් ඇත. මා එහි පිවිස ඔවුන්ගෙන් විමසා සිටියේ, කණ ආශ්‍රිත මවිල් ස්ථිරව ඉවත් කළ හැකිද යන්නයි. නමුත් ඔවුන්ගේ සුදානම මුහුණට සාත්තුවක් කිරීමයි. ඒ සඳහා පැය එකහමාරක් ගතවන බව දැනගත් පසු, මට කදිම අදහසක් ඇති විය. මේ පැය එකහමාර හොඳ නින්දක් ලබාගත හැකිය. මා මුදල් ගෙවා ඔවුන්ගේ ඇඳට ගොඩ වී උපදෙස් දුන්නේ මා නිදා ගන්නා බවත්, කාර්ය අවසන් කර මිස මා නින්දෙන් අවදි නොකරවන ලෙසත්ය. මට නින්ද කෙසේ ලගා විනිදැයි මතකයක් නැත, ඔවුන් මා ඇහැරවන්නටද සෑහෙන ප්‍රයත්නයක යෙදී ඇත. ඔවුන්ට ස්තුතිකර සන්තෝසමක් ලබා දුන් මා, කෙළින්ම පිටත් වුයේ වතුර බෝතලයක් මිලදී ගැනීමටය. මේ ගැන මාගේ මතකය අවධි වුයේ, රුපවාහිනි නාලිකාවක පේෂල් එකක් කරන දසුනක් දැකීමෙන්ය. මෙවැනි ඔබේ මනසේ සැඟවී ඇති බොහෝ දේ ඉඳහිට ඉන් එලියට පනියි. එවැනි අවතාවක මෙසේ සටහන් කර තැබීම වටියි

ඉස්සන්, මගුරන්, ලොකු වැලිගොව්වන් ....

89/90 අඳුරු යුගය(Dark Era 89/90) (9) pinth (1) අතීත සොඳුරු මතක (Fond Memories / Nostalgic stuff) (14) අතීතකාමය (Nostalgia) (8) අනතුරු (Accidents) (1) අමතක වන්නට පෙර(Before Forget it (7) අවන්හල් (Restaurants) (4) ඇතුල් පැත්ත ( Inside Story ) (1) ඉවුම්-පිහුම්(Cooking) (1) එළුපැටියාගේ කතා (Baby Goat Stories) (1) ඔබේම දෑතින් (Doo it yourself) (7) කළුතර මහා විද්‍යාලය ( Kalutara Maha Vidyalaya ) (4) කාළීන(Current Issues) (65) කුතුහලය(Curiosity) (70) කෙටි කතා (Short Stories) (1) ක්‍රිකට් (Cricket) (12) ක්‍රිකට්(Cricket) (32) ක්‍රීඩා(Sports) (20) ක්‍රෙඩිට් කාඩ්(Credit Cards) (8) ගණිත ගැටළු (Mathematical Problems) (4) ගමේ චරිත(My Villagers) (12) ගැටළු (Competitions) (2) ගීත ( Songs ) (2) ගෘහස්ථ කාරණා (Household Matters) (2) චිත්‍රපට(Movies) (3) ජීවන අත්දැකීම් ( Life Experience) (45) තාක්ෂණය(Technology) (18) දැකීම ( Observations ) (1) දැනුම(knowledge) (58) දේශපාළණ(Political) (14) නින්ද (Sleep) (2) නුවර එලිය ( Nuwara Eliya ) (1) පරිවර්තන (Translations) (39) පර්යේෂණ(Research) (16) පාපන්දු(Football) (14) පිටසක්වල ( Extra Terrestrial ) (1) පුවත් පතට ලියු (Published in Press) (1) පොත් (Books) (4) ප්‍රථමාධාර(First Aid) (1) බෙන්තොට (Bentota) (2) බෙන්තොට ක්‍රීඩා සමාජය(Bentota Sports Club) (3) බෙන්තොට බීච් හෝටලය ( Bentota Beach Hotel ) (1) මං සලකුණු ( Milestones ) (7) මගේ දුව(My Daughter) (10) මගේ පියා (My Father) (2) මගෝඩි වැඩ (Humours) (4) මට හමු වූ අමුතු චරිත Rediculous people I met (3) මට හමු වූ මිනිසුන් ( People I met ) (7) මහජන බැංකුව (People's Bank) (5) මා ලියු කවි ( My Poems ) (1) මොබයිල්(Mobile) (3) යෝජනා (Proposal) (1) රිවරිනා හෝටල් (Riverina Hotel) (3) රූපවාහිනී වෙළඳ දැන්වීම් ( TV Commercials ) (1) රෙඩ්බුල් කැම්පස් ක්‍රිකට්(Redbull Campus Cricket) (11) ලොල් කතා(Funny Stories) (55) ලෝක කුසලානය (World cup) (4) විද්‍යා ප්‍රබන්ධ( Science Fiction ) (1) විනෝදාත්මක(Entertainment) (115) විවේචන(Critics) (56) ව්‍යායාම(Excercises) (3) සංචාරක(Travel) (26) සාකච්චා(Interview) (8) සුදීක(Sudeeka) (93) සෞඛ්‍යය( Health ) (2) හැඟුම්බර(Emotional) (42) හිරුආරක්ෂණ(Sun Protection) (2) ෆේස්බුක් (facebook) (1)

අනන්තය කරා ඉගිලෙන ඔබේ සිතුම් රේඛාවේ ......

Related Posts Plugin for WordPress, Blogger...