Saturday, July 26, 2014

අමතක වන්නට පෙර I : විදුලි සෝපානය,පන්ච් කාඩ්/ටේප් සහ මම ...... Before forget it I : Elevator , Punch Cad/Tape and me

විදුලි සෝපානයන් පිලිබඳ සංගණන වාර්තාවක්  කොතැනක හෝ තිබේද ? කොතැන හෝ තිබිය යුතුයි. එසේනම් ශ්‍රී ලංකාව තුල මේ වනවිට විදුලි සෝපාන කොපමණ ඇතැයි ඔබ සිතනවාද ? මෙයට නිශ්චිත පිළිතුරක් දීමට කිසිවෙකුට හැකි වේ යයි මා විශ්වාස කරන්නේ නෑ. නමුත් මේ ප්‍රශ්නය එක් දහස් නවසිය හැත්තෑ ගණන් වල ඇසුවා නම්, ඊට නිවැරදි පිළිතුරු දීමට කිහිප දෙනෙකුම සමත් වනු ඇත. 

මා මුලින්ම විදුලි සෝපානයක ගමන් ගත්තේ පෙර කියූ කාල වකවානුවේදීය. ඒ  කොළඹ මරදානේ සිටි, කොළඹ නැන්දාලාගේ නිවසට පැමිණි දිනක, සෙලින්කෝ ආයතනයට අයත් ආකාස කඩේ නමැති ආපන ශාලාවේ සේවය කල පියසිරි අයියා මුණ ගැසීමට ගිය ගමනේදීයි. මගේ මතකය නිවැරදි නම් එය තට්ටු හතරක හෝ පහක ගොඩනැගිල්ලකි. නමුත් ඒ කාලයේ ලංකාවේ උසම ගොඩනැගිල්ලක් ලෙස මෙය සඳහන් වූවා මතකය. ඒ කාලයේදීම සෙලින්කෝ ගොඩනැගිල්ල පසුබිමෙහි තබාගෙන හිඳ සිටින යුවතියන් දෙදෙනෙකුගේ ඡායාරූපය සහිත කැලැන්ඩරයක් තිබුණ බව මතකය. 
Old electric elevator  පැරණි විදුලි සෝපානය
පින්තූරය ගත්තේ : http://www.dreamviews.com/

එකල අද මෙන් විදුලි සෝපාන වලට ස්වයංක්‍රීයව වැසෙන දොරවල් තිබුණේ නැත. ඒ වෙනුවට තිබුණේ අතින් අදින යකඩ දොරවල්ය. එයට ඇතුල්වන පිරිස ගොඩ වූ පසු මෙම දොරවල් දෙපසින් වසනු ලැබේ. ඉන් පසුව සෝපානය ඉහළ-පහළ ගමන් ගනු ඇත. මා මුලින්ම සෙලින්කෝ සෝපානයේ කල ගමන අදටත් මතකයේ රැඳී තිබේ. එය ඉහල යනවිට මගේ සහෝදරයාට කැරකිල්ල සැදුනි. කුඩා ළදරුවකු වූ ඔහු මවට තුරුල් විය. ඉන් පසු එන ගමනේදී, ඔහු වඩා ගන්නා ලෙස, මවගෙන් ඉල්ලා සිටියේය. පසුව අප මේ කාරණය පවසා ඔහුට විහිළු තහළු කළෙමු. මන්ද ඊට බාල මගේ නැගණිය කිසිදු අපහසුවකින් තොරව එහි ගමන් ගත් නිසාය. 

සෙලින්කෝ ඉහළ මාලය සිට කොළඹ හාත්පස දෙස නැරඹු ඒ දිනය කිසිදා නොමැකෙන මතක සටහනකි. කොළඹ වරයද, සී.ටී.ඕ. ගොඩනැගිල්ලද එකල දකින්නට තිබූ දසුන්ය. ඉද්ද ගැසූවක් මෙන් කොල්ලුපිටිය දක්වා පැහැදිලිව පෙනෙන ගාලු පාරද, ගෝල්ෆේස් තනතිල්ල්ද මැවූ මනස්කාන්ත දසුන අදටත් සිහිපත් වේ. ආපසු එන ගමනේදී එහි ස්වයංක්‍රීය පඩිපෙලක්ද තිබූ බව මතකයක් ඇත. තවත් අමතක නොවන සිද්ධියක් වන්නේ කුඩාකල මට තිබූ නරක පුරුද්දක් එහිදී ක්‍රියාත්මක වීමයි. ඒ සැමතැන විසිරී තිබූ කහ පැහැති, තැනින් තැන හිල් විද තිබූ ටේප් පටි තොගයක් එකතු කරගෙන එන්නට සුදානම් වීමයි. කවුරුන් විරුද්ධ වුවත් මා ඒවා අත අරින්නේ නැති බව මගේ දෙමව්පියන් දන්නා නිසා, ඒවා එකතු කරගන්නා තුරු ඔවුන් නෝක්කාඩු මුහුණින් බලා සිටි අයුරු තවමත් සිහිපත් වේ. 
පින්තූරය ගත්තේ : http://geschichte.inf.tu-dresden.de/

ජාතික ව්‍යාපාර කළමනාකාරීත්ව ආයතනයේ එක්දහස් නවසිය අනූ ගණන් වල තිබූ සුපතල පරිගණක පාඨමාලාව හදාරන්නට පසුව ගිය ගමනේදී කලින් කී විදුලි සෝපානය සහ පන්ච් ටේප් සහ පන්ච් කාඩ් දකින්නට ලැබීම දෛවෝපගත සිදුවීමකි. එම ආයතනයේ විදුලි සෝපානය සිසුන් භාවිතා කරනවාට ආචාර්ය ජයසිරි මහතා මනාපයක් නොදක්වන ලදී. එහි ගමන් කරන විට සෝපානයේ දොර විවෘත කළහොත් , සෝපානය මග නතර වේ. එකල සිටි පෙම්වතුන් මෙය අවභාවිත කල බව දැන ගන්නට ලැබුණි. ඉහළ පින්තූරයේ තිබෙන පන්ච් ටේප් සහ පන්ච් කාඩ් යනුවෙන් සඳහන් කාඩ් මුල් පරිගණක යුග වල දත්ත සටහන් කර තැබීම සඳහා භාවිතා කල ක්‍රම දෙකක් වේ. 
Punch Tapes සිදුරු සහිත අංකිත කාඩ් පත්
පින්තූරය ගත්තේ : http://www.retrotechnology.com/
මේවායේ දත්ත සටහන් කිරීම ටයිප් රයිටරයක් වැනි උපකරණයකින් සිදු කර තිබේ. ශ්‍රී ලංකාවේද මුල් කාලවල පරිගණක භාවිතයේදී මේවා යොදාගෙන ඇත. ජාතික ව්‍යාපාර කළමනාකාරීත්ව ආයතනයේදී මේවා ගැන ඉගෙන ගත්තා මතකය. මේවාගේ දත්ත සටහන් කිරීම ඉතා රසවත් ආකාරයකට සිදු කරයි. ඔබ කැමැත්තක් දක්වනවා නම් පසු සටහනකින් ඒ පිළිබඳ දැනුවත් කරන්නම්. 

එදා තිබූ විදුලි සෝපාන හා සැසඳීමේදී අද ඇති විදුලි සෝපාන ඉතා ඉහල තාක්ෂණයකින් යුක්තය. නමුත් යොදා ගන්නා මූලික තාක්ෂනය එකමය. අද ස්වයංක්‍රීයව ක්‍රියාත්මක වන විදුලි සෝපාන බොහෝ ස්ථාන වල ඇත. මින් ලෝක වෙළඳ මධ්‍යස්ථානයේ ඇති සෝපාන ඉතාමත් වේගවත් බව මගේ විශ්වාසයයි. එයට හේතුව වන්නේ නගින්නට තිබෙන උස වැඩි නිසා ඒවා වේගවත් කළහැකි වීමයි. අද විදුලි සෝපානයක් නැති තැනක් කොළඹ නගරයේ සොයා ගන්නට නොහැකි තරම් වුවත්, මා සඳහන් කල යුගයේ සෙලින්කෝ ආයතනය හැරුණුකොට ජාතික ඉතිරි කිරීමේ බැංකුවේ එම පහසුකම තිබූ බව මගේ ඉහල නිලධාරියා වන ලසන්ත මහතා පවසයි. 

අද තිබෙන විදුලි සෝපාන තුල තිබෙන පහසුකම් සහ තාක්ෂනය ඉතා ඉහලය. ස්වයංක්‍රීයව ක්‍රියා කිරීම ඉන් ප්‍රධාන ලක්ෂණයයි. මේවා මයික්‍රෝචිප් ආධාරයෙන් ක්‍රියාත්මක වේ. වේග පාලනය, බර පාලනය, දොරවල් ඇරීම වැසීම, අනතරු ඇඟවීම ආදී බොහෝ දේ අද ස්වයංක්‍රීයව සිදු වේ. කෙතරම් තාක්ෂනය දියුණු වුවද, විදුලි සෝපාන හිර වීම නතර කල නොහැක. නිතර භූමි කම්පා තිබෙන රටවල් වල මේවා කෙසේ ක්‍රියාත්මක වනවාද යන්න සොයා බැලීම වටී. ත්‍රස්තවාදී කලබල තිබූ කාලයේ මගේ මිතුරෙකු කිසි දිනක ලිෆ්ට් එක භාවිතා නොකළේය. ඒ බෝම්බ පිපිරීමක් වැනි අවස්තාවකදී ඒවා අනිවාර්යයෙන්ම හිර වන නිසාය. මෙයට අමතරව විදුලි විසන්ධි වීමකදීද සෝපානය හිර වෙයි. නමුත් අද තිබෙන සෝපානයක් එසේ වුවහොත් පහසුවෙන් එලියට එන්නට හැකිය. 

Thursday, July 24, 2014

මට හමු වූ අමුතු චරිත I : කෙතා ...... The ridiculous people I met I : ketha

දෙදහස් දොලහේ ජනවාරි පළවෙනිදා සිට ආරම්භ කල බ්ලොග් ලිවීම, අකණ්ඩව එකම වේගයකින් පවත්වාගෙන එන්නට හැකි වුවද, පසුගිය මාස දෙකක කාලය තුල ඇතිවූ කාර්‍යබහුලත්වය සමග, බ්ලොග් ලිවීම සහ කියවීම සඳහා වෙන් කළහැකි කාලය ඉතාමත් අල්ප විය. එයට එක් හේතුවක් වූයේ, මා ඒ සඳහා ගතකරන රාත්‍රී දහයත් දොළහත් අතර කාලය තුල පාපන්දු ලෝක කුසලානයේ තරග විකාශණය වීමය. වෙනදා දහවල් කාලයේ බ්ලොග් කිහිපයක් කියවීමට හැකියාව තිබුණද, ජනසතු සේවා ක්‍රිකට් තරගාවලියේ තරග මේ දිනවල පැවැත්වීම නිසා එයට කණ්ඩායම් සහභාගී කරවීම මගේ වගකීම වූ නිසාත්, එම තරගාවලිය www.crickhq.com නමැති වෙබ් අඩවියේ යාවත්කාලීන කිරීම(Admin) මගේ වගකීකම් වූ නිසාත්, එම අවස්තාව මග ඇරිණි. කාලයක පටන් "මට හමු වූ අමුතු චරිත" යන ප්‍රවර්ගයෙන් සටහන් කිහිපයක් තැබීමට බලාපොරොත්තුව සිටියද, එයට අවස්ථාව නොවූයේ, වෙනත් කාලීන මාතෘකා ඔස්සේ ලියන්නට සිදු වූ නිසාය. අද පටන් එය ආරම්භ කිරීමට සිත් වූයේ, කෙසේ හෝ මේ චරිත පිළිබඳ ලියා තැබීම මගේ කුඩා කල සිට තිබූ බලාපොරොත්තුවක් නිසාය.
පින්තූරය ගත්තේ : http://ingulfed.com/

කෙතා පිළිබඳ මගේ මතකය ඇති වන්නේ, මා බෙන්තොට ගාමිණි මහා විද්‍යාලයේ කනිෂ්ඨ අංශයේ ඉගෙනීම ආරම්භ කල කාලයේ සිටය. කුඩා දරුවන් වශයෙන් අප කෙතාට මහත් බියක් දැක්වීමු. එයට හේතු වූයේ, කෙතා සමාජයේ ජීවත් වන සාමාන්‍ය වැඩිහිටියෙක් නොවූ නිසාය. අප දකින කාලය වනවිටත් ඔහු තිස්ගනනක වයසක පසු වූ බව මගේ විශ්වාසයයි.ඔහුගේ කෘෂ වූ ශරීරයත්, බියකරු පෙනුමත් කිසිදා ඔහු කෙරේ අනුකම්පාවක් ඇති නොකළේය. ඔහු කිසිදිනක උඩුකය ආවරණය කරගෙන සිටිනවා අප දැක නැත. ඔහුව තනිපංගලමේ මුණගැසීමට කුඩා ළමුන් වූ අප සේම වැඩිහිටි කාන්තාවන්ද භිය විය. හේතුව ඔහු ලඟින් ඔහු පසුකර යනවිට ඉතා භියකරු හඬක් නංවා ඉදිරියට එන කෙනා භිය ගැන්වීම කෙතාගේ පුරුද්ද වූ නිසාය. ඔහු මන්ද මානසික තත්වයේ පසු වූයේ යයි කෙනෙකු පැවසුවද, අප පාසල් ප්‍රදේශයට කෙතා පැමිණෙන්නේ වැටුණු පොල්ගෙඩි හෝ පොල් අතු රැගෙන යන්නය.

කෙතා කුඩා කාලයේ ගිරවෙකු මෙන් හොඳින් කතා කළ අයෙකු බවත්, ඔහුගේම පවුලේ කෙනෙකුගේ ඇස්වහ නිසා ගොලුත් නැති, එහෙත් පැහැදිලිව කථා කල නොහැකි, ක්ෂණිකව කේන්ති හට ගන්නා තත්වයකට පත් වී ඇත. එහෙත් කොයි මොහොතේ බැලුවත් රෙදි ගොන්නක් හොදා ගැනීමට අප පාසල අසලින් ගලා යන ලන්දේසි ඇලට හෝ එසේ සෝදා ගත් රෙදි වෙලා ගැනීම සඳහා ඒවා පාසල් පිට්ටනියේ අතුරා පසෙකට බලාගෙන සිටීම ඔහුගේ සිරිතයි. කෙතාගේ හරි නම කුමක්දැයි කිසිවෙකු නොදනී, කෙතා යන නම් පටබැඳීමටද හේතුවක් විය. ඒ ඔහුට "කෙත-කෙත" යනුවෙන් ආමන්ත්‍රණය කලවිට ඇඳ සිටින සරම උස්සා පෙන්වීමේ පුරුද්ද නිසාය. මේ නිසා බොහෝ තරුණ ගැටව් කලේ එසේ පවසා ඔහු කෝපයට පත් කිරීමයි. සමහරුන්ට එය මහත් කරදරයක් විය. ඒ කෙල්ලන් දුටු විට ආරාධනයකින් තොරවම එසේ තම නිරුවත පෙන්වීමයි. සමහරෙක් ඔහුගේ රහස් ප්‍රදේශයේ කහඹිලියා ගෑ කථාද අසන්නට ලැබුණි. එකල අපටද එය ආශ්වාදජනක පුවතක් වුවද, බොහෝ කාරුණික පුද්ගලයන්ගේ දැනුවත් කිරීමෙන් පසු ඔහු ගැන අනුකම්පාවක් ඇති විය.

අප පහේ ශිෂ්‍යත්වයට මුහුණ දුන් කාලයේ, අපගේ පන්ති භාර ගුරුපියාණන් වූ රත්නසේන මහතා අපට නොමිලයේම අමතර පන්ති පැවැත්වීය. එක් අප්‍රේල් නිවාඩුවක එසේ පවත්වන පන්තියට අප පැමිණියෙමු.  කෙතා ජීවත් වූ කහඹිලියා කන්ද හන්දියෙන් පිටාරඹ නමැති සංචාරක හොටල අසලට දිවෙන පාරේම ජීවත්වන අප පන්තියේම කොලුවෙකු වූ ලක්ෂ්මන් පැවසූවේ, තමා සහ මානෙල් පිටුපසින් කෙතා පන්නාගෙන ආ බවත්, ඔවුන් දෙදෙනා බේරුණේ අනුනාවයෙන් බවත්ය. මෙයි කෝපයට පත් අප කෙතා සොයා මෙහෙයුමක් දියත් කළෙමු. පාසල් භූමිය මාධ්‍යයෙන් ගලා යන ලන්දේසි ඇලට උඩින් දමා ඇති කොන්ක්‍රීට් පාලම පසුකොට පිට්ටනිය දෙසට ගමන් කරනු කෙනෙකු දැක තිබුණි. වහා ක්‍රියාත්මක වූ දහයක් දොළහක් වූ අප පිරිසි එදෙසට ගමන් කළෙමු. පොල් ගෙඩියක් එක් අතකින් එල්ලාගෙන කෙතා පාසැල් පිට්ටනියේ මුල්ලකට වන්නට එල් හැඩයට පිටා තිබූ ගොඩනැගිලි දෙක අසල විය. අප සියලු දෙනා අතට අහු වූ පහර දිය හැකි කිසිවකින් සන්නද්ධ වූහ. තවත් මොහොතකින් ඔහු සිටින තැනට මීටර් පහ හයක් ඈතින් නතර වූයෙමු. එහෙත් කෙතා අප දුටුවේ නැත, ඔහු සිටින්නේ අපට පිටුපාය. අප අතර සිටින කටකාර කොලුවා වූ විජිත කෙත - කෙත යනුවෙන් මොර දුන් විට ආපසු හැරී පොල් ගෙඩිය බිම දමා, දෑතින්ම සරම් ඉහලට ඔසවා අපට ආචාර කළේය. ඉන්පසි අපගේ ප්‍රහාරය දියත් වුවද, කෙතා සරම පහත හෙළුවේ නැත. එකදිගට ඔහු වියරු භාෂාවකින් මොනවාදේ මොර දෙයි. අප අතර සිටින තරමක් එඩිතර ඩග්ලස්, විජිත, ලාලන්, කපිල වැනි අය අසල තිබූ මද වැලකින් මඩ රැගෙන ඔහුට පහර දෙන්නට විය. එම මඩ ඔහුගේ රහස් ප්‍රදේශය ඉලක්ක කර එල්ල විය. මොහොතකින් එම ප්‍රදේශය මඩ වලින් වැසී ගියේය. කෙතාගේ දෑසින් කඳුළු ගලා එනු මා ප්‍රථම වතාවට දුටිමි. කෘෂ ශරීරය සහ ගිලී ගිය ඇස, නහරවැල් පෑදුනු තට්ට හිස සහිත පිටසක්වල ජීවියෙක් බඳු පුද්ගලයා අසරණ තත්වයකට පත් වී ඇත. මේ අතර අපකරා දිව ආවේ අපේ පන්තියේ කෙල්ලකු වූ චම්පාය. "අන්න සර් පන්ති පටන් ගන්න කථා කරනවා" යන පණිවුඩය ලැබීමත් සමග අප සියලු දෙනා ඇය පසුපසින් පන්තියට දිව්වෙමු.

එම වර්ෂයෙන් පසු පන්තියේ බොහෝ දෙනෙකු ඇතුළුව මමද, ගමේ පාසලට ආයුබෝවන් කියූ නිසා කෙතා යලි මට මුණ ගැසුණේ සවස ක්‍රිකට් පුහුණුවීම් සඳහා යන අතරය. මා යන මාර්ගයේ ඔහු මුණගැසුනොත් අසල නිවසක වත්තකට දිව යන මා, නැවතත් ඔහු මා පසුකර ගියවිට හැල්මේ ක්‍රීඩාංගනයට දිව යන්නේය. එවිට මගේ හෘදස්පන්දනය ඉතා ඉහළ යයි. අව්වක්, වැස්සක්, හුළඟක් නොබලා තමන්ගේ ගමනේ යන කෙතාගේ ඥාති සහෝදරයෙකු වූ ගොළුවාද ඔහුටම ආවේණික භාෂාවක් දක්වමින් ඉඳහිට අප අසලින් ගමන් ගත්තද, කෙතාමෙන් කේන්ති ගන්නා අයෙකු නොවීය. දෙදෙනා එකවර මුණ ගැසුණේ නැත්ත ඔවුන් දෙදෙනා ඒ තත්වයට පත් කර ඇත්තේ ඔවුන්ගේ දේපල ලියා ගැනීමට බවත්, කෙතාගේ පරිවර්තනය නිසා ඒ සොවින් ඔහුගේ දෙමාපියන් මිය පරලොව ගොස් ඇතිබවත් අසන්නට ලැබිණි.

සමාජයේ කොතෙකුත් මෙවැනි අඩුපාඩු සහිත පුද්ගලයන් අපට මුණ ගැසෙයි.  කුඩාකල නොතේරුම් කමට මෙවැනි දෙයකට ඉදිරිපත් වුවද, ඉන් පසුව මා තරයේ එවැනි ක්‍රියා වලට විරුද්ධ වී ඇත්තෙමි. 

Sunday, July 13, 2014

වෙළඳ සමාගම වලට ජංගම දුරකථන අංකය ලබා දෙන්නේ බලාගෙනයි....... Be careful when providing your mobile number to Companies

2013 දී රෙඩ්බුල් ආයතනය විසින් සංවිධානය කරන ලද, ලෝක කුසලනා සරසවි ක්‍රිකට් තරගාවලිය ආවරණය කරන්නට මාධ්‍ය හැඳුනුම්පතක් පැළඳ, ප්‍රේමදාස ක්‍රීඩාංගනයෙහි මාධ්‍ය කුටියට පිවිසෙන්නට මටත් වරම් ලැබුණා. එහිදී ක්‍රිකට් ක්‍රීඩාවට සම්බන්ධකම කියන බොහෝ දෙනෙකු සමග නිදහහසේ අදහස් හුවමාරු කරගන්නත් අවස්ථාව එළඹුණා. 
mis use of mobile number sending junk sms
පින්තූරය ගත්තේ : http://www.jatxt.com

මේ මාධ්‍ය කුටිය තුලම ක්‍රිකට් ක්‍රීඩාවට සෘජුව සබඳකම් නොදක්වන පිරිසකුත් වෙනස් ආකාරයක මාධ්‍ය ආවරණයක යෙදී සිටියා. ඒ අතරින් පාකිස්තාන යුවතියක් වූ මාරියා මම සහ නදීර සුහද පිළිසඳරක යෙදී සිටින මොහොතක මගේ ජංගම දුරකථනයට ආ කෙටි පණිවුඩයක් අවසානයේ මා එය අනවශ්‍ය, වෙළඳ ප්‍රවර්ධනය සඳහා එවනු ලැබූවක් බව පවසා සිටියා. ඒ මොහොතේ ඒ පිලිබඳ දීර්ග විග්‍රයහයක නිරත වූ පාකිස්තානු යුවතිය මරියා පවසා සිටියේ  


"ඇයි ඔබ එස්.එම්.එස්. මාකටිං ගැන දන්නේ නැතිද ? පකිස්තානයේ නම් එය ජනප්‍රියම වෙළඳ ප්‍රවර්ධන මාධ්‍යය වී හමාරයි"

යනුවෙනි. ඒ වනවිට එම ගනයේ එස්.එම.එස්. කිහිපයක්ම ලැබෙමින් පැවතියද, අද පවතින තත්වයට කරදරකාරී මටටමකට එය එළැඹේ යයි සිහිනෙකින් වති සිතුණේ නැත. ඒ වනවිට පාකිස්තානයේ දෛනික සාමාන්‍ය කෙටි පණිවුඩ ප්‍රමාණය විසි හයක් බව ඇය පවසා සිටියා.

2013 දී මෙය එතරම් ගැටළුවක් නොවුනද, ඉන් හරියටම අවුරුද්දක් පසු වූ තැනදී මට මෙය මහත් හිසරදයක් වී ඇත. ඔබගේ ජංගම දුරකථන අංකය ඔවුන්ට ලැබෙන්නේ කෙසේද ? මෙය ඉන්පසු ඔබට ඇතිවන ගැටලුවයි, නමුත් මදක් මේ පිලිබඳ කල්පනාවක යෙදුනහොත් එය ලබා දී ඇත්තේද ඔබම බව ඔබට පසක් වනවා ඇත. කෙසේද ? මදක් සිතා බලන්න

ඔඩෙල්, නෝලිමිට්, හමීඩියා, කීල්ස්සුපර්, ආර්පිකෝ, ඩයලොග් සහ කාගීල්ස් ආයතන ඔබට ලොයල්ටි කාඩ් ලබා දෙති. එසේ ලබා දෙන්නට ඔබ පුරවන අයදුම්පතට ඔබ ජංගම දුරකථන අංකය ඇතුලත් කලබව දැන් ඔබට පැහැදිලි වනු ඇත. එසේ ලබාගත් අංක ඔවුන්ගේ දත්ත ගබඩාවල පසුගිය කාලයේ තිබෙන්නට ඇත. නමුත් මේ ප්‍රවර්ධනය ආරම්භ වූ පසුගිය අවුරුද්ද තුල මේවා ක්‍රම-ක්‍රමයෙන් භාවිතා කරන්නට ඔවුන් තීරණය කරන්නට ඇත්තේ, ඒ ආයතන සමග ගනුදෙනු සඳහා ඔබ නිතර නොයන බව වැටහුන පසුවය.

ඔවුන් ඔබගේ අංකය ලබා ගන්නා තවත් ක්‍රමයක් වෙයි. ඒ ඔබගේ බිස්නස් කාඩ්පත දමන්නට තිබෙන මංජුසාවට ඔබ දැමූ කාඩ්පත හරහාය. එවැනි අවස්ථාවක එය දිනුම් ඇදීමක් සඳහා බව ඔවුන් සඳහන් කර තිබීම, මේ සඳහා ඔබ පොළඹවන ප්‍රධාන සාධකයයි. නමුත් පසුව හැල්මේ ඔබට එස්.එම්.එස් පණිවුඩ එම ආයතන වලින් ලැබෙද්දී, ඔබේ සිතට එකවර ඇතිවන  ගැටලුව වන්නේ

" මගේ අංකය ඔවුන් දන්නේ කොහොමද ?" 

යන්නයි. නමුත් එය ඔබම ලබාදුන් එකක් බව මගේ මිතුරන් කිහිප දෙනෙකුට මා පැවසුවද, ඔවුන් එය පිලි ගන්නේ බොහෝ වෙලාවක් තර්ක කිරීමෙන් පසුවය. නමුත් ඔබේ පහසුවට හේතු වන කෙටි පණිවුඩ වර්ග කිහිපයක්ද වෙයි. ඒ ක්‍රෙඩිට් කාඩ් ආයතන, රක්ෂණ සමාගම්, ලීසිං සමාගම් වැනි ඔබ සේවා ලබාගෙන මාසිකව වාරික වශයෙන් ගෙවිය යුතු මුදලක්, හෝ ඔවුන් විසින් වෙනත් ආයතන සමග එක වී ලබා දෙන වට්ටම් පිළිබඳ කරන දැනුම් දීමය. එවැනි ඒවාගෙන නියමිත දිනට පෙර මුදල් ගෙවීම සහ ඔවුන් ලබාදෙන වට්ටම් වලින් අවශ්‍ය ඒවාගෙන ප්‍රයෝජන ගත හැක.

අතීතයේදී පත්‍රිකා බෙදීම, කුඩා පොත්පත් තැපැල් මගින් එවීම වැනි ක්‍රියාවලීන් මගින් ගනුදෙනු කරුවන් ආකර්ෂණය කරගත් මෙම ආයතන, අද තෝරාගෙන තිබෙන්නේ ඉතාම කාර්යක්ෂම මාධ්‍යකි. හේතුව ජංගම දුරකථනයක් නොමැති අයෙක් සොයා ගැනීමට නොහැකි වීමයි. අද ශ්‍රී ලංකාවේ එක් පුද්ගලයෙකු සතුව අඩුම තරමින් සිම්පත් දෙකක් හෝ තුනක් ඇත. මේ බව දන්නා මේ ආයතන මේවාගෙන් උපරිම ප්‍රයෝජන ලබා ගනිති.

මේවා භාවිතා කරන අයගේ භාෂා ඥාණය හොඳින්ම ග්‍රහණය කර ගන්නේ ජංගම දුරකථන සමාගම්ය. ඒ ඔවුන් සවන්දීමට කැමති භාෂාව කුමක්දැයි, සිම්පත ලබාදුන් මොහොතේම දැන ගන්නා නිසාය. ඒ මගින් ඔවුන් එවන පණිවුඩයේ භාශාවද සීරුමාරු කරයි. සිංග්ලිෂ් වලින් ජංගම දුරකථන ආයතන වලින් කෙටි පණිවුඩ සහ සේවා පණිවුඩ ලැබෙන්නේ එසේය.

සමහර ජංගම දුරකථන සමාගම හිඟා කන මට්ටමට පත් වී ඇති බව පවසන්නේ, මට ප්‍රවාහනය සපයන චාමර නමැති ත්‍රී රෝද රථය පදවන පුද්ගලයාය. ඔහු ත්‍රී රෝද රථය පදවන්නේ ඔහුගේ පහසුවටය. ඔහු ගොඩනැගිලි කොන්ත්‍රාත්කරුවෙකි. එයට අමතරව යනෙන ගමන් හයර් එකක් දෙකක් කිරීම ඔහුගේ සිරිතයි. ජංගම දුරකථන ආයතන කෙටි පණිවුඩ වලට අමතරව, පටිගත කල ඇමතුම්ද එවීමට මෑතක පටන් ක්‍රියාත්මක වීම ඔහුගේ තැවුලට හේතුවයි. දිනක් ගනුදෙනුකාර සේවා අංකයට අමතා, තමාට අවශ්‍ය ඇමතුම ලබා ගැනීමට පමණක් බවත් මින් පසු කිසිදු වෙළඳ ප්‍රවර්ධන ඇමතුමක් තමාට ලැබුණොත් හොඳ වැඩක් කරන බවට තර්ජනය කල පසු, එසේ ලැබෙන සියළුම ඇමතුම අත්හිටුවා ඇත.

ජංගම දුරකථන ආයතන කරන තවත් පිළිකුල් සහගත ක්‍රියාවක්ද, මාතෘකාවට අදාල නොවුනත් මෙහි සඳහන් කිරීම වටී. විවිධ සේවා ගනුදෙනුකරුවාගේ අනුදැනුමකින් තොරව සතියක හෝ මාසයක කාලයක් සක්‍රීය කර තබා, ඉන් පසු එම සේවාව අවශ්‍ය නම් "ගාස්තු සහ කොන්දේසි සහිතයි" යනුවෙන් සඳහන් කෙටි පණිවුඩයක් ගනුදෙනුකරු වෙත යවයි. නමුත් සියළු ගනුදෙනුකරුවන් මේවා කියවන්නේ නැත. කොටින්ම මමද  කරන්නේ දුරකථන ආයතන වල සියළුම කෙටි පණිවුඩ මකා දැමීමයි. මෙමගින් සිදු වන වරද තේරුම් යන්නේ ඉන්පසු වතාවේ ගිණුම රී-චාර්ජ් කල පසුය. ඔවුන් පළමුවෙන්ම ඔවුන්ගේ ගාස්තු අය කර ගනී.

මෙම ඝණයේ කෙටි පණිවුඩ අයත් වන්නේ Junk හෝ Spam ගනයට වුවත්, ඊ මේල් වල මෙන් අපට ඒවා, එසේ කාණ්ඩ ගත කල නොහැකි වීම අවසානාවන්ත තත්වයකි. මේ කෙටි පණිවුඩ අප වෙත සම්ප්‍රේෂණය කරන දුරකථන සමාගම් ඔවුන්ගේ නමින් අප වෙත එවැනි පණිවුඩ එවන්නේ යම් මුදලක් අදාළ වෙළඳ සමාගම් වලින් අය කර ගනිමින් බව පැහැදිලිය. මේවා Junk  මට්ටමට පත් නොකර, තම ගනුදෙනුකරුට දුරකථන සමාගමත් එපා වන තත්වයට පත් නොකර තබා ගැනීම ඔවුන්ගේ යුතුකමයි.  

Tuesday, July 1, 2014

ආහ් ! මට බ්ලොග් එකකුත් තියෙනවා නේද ? ...... Ah ! I have a blog too ?

ah ! ideas ආහ් ! අදහස්
පින්තූරය ගත්තේ : http://valeriekhoo.com
වෙලාවකට මට හිතෙනවා මට බ්ලොග් ලිවිල්ල ඇති වෙලා කියලා. ලියන්න බොහෝ මාතෘකා තිබුණත්, ඒවා අමතක වෙලා යන්නේ හිරු දුටු පිනි වගේ. සමහර ඒවා අමතකම වෙලා යනවා. මම වරක් එක්තරා ධනාත්මක චින්තන වැඩසටහනකට සහභාගී වුණු වෙලාවක ලැබුණු එක් හොඳ උපදේශයක් තමයි මම මේ පැහැර හැරලා තියෙන්නේ කියලා මට තේරුම් ගියේ මේ වගේ ලියන්න හොඳ මාතෘකා සිය ගණනක් අමතක වෙලා ගියාට පස්සේ. මෙහෙම දේවල් අමතක වෙන්න එක ප්‍රධාන හේතුවක් තමයි ඔබේ කාර්‍යබහුලකම. මේ දවස් වල පැවැත්වෙන පාපන්දු ලෝක කුසලානයේ තරග නරඹලා මුළු දවසම නිදිබරව ඉන්න වෙලා තිබෙන එකත් එක හේතුවක්. මොනවා වුණත් ගිය නුවණ ඇතුන් ලවා වත් අද්දවා ගන්න බෑ කියන කියමන තවත් වරක් සනාථ කරපු දෙයක් තමයි වුණේ.


අපේ සමහර බ්ලොග් කරුවෝ කියන දෙයක් තමයි එයාලා පුළුවන් වෙලාවට ලියලා ඒවා පසුව පබ්ලිෂ් කරනවා කියන එක. මට කරන්නම බැරි වැඩක් තමයි ඒක. මොකද මම එහෙම සැලසුම් කරලා ලිපි ලියන කෙනෙක් නොවන නිසා. මම කරන්නේ එක දිගට ටයිප් කරගෙන ගිහින් පබ්ලිෂ් කරලා දාන එක. සමහර සටහන් වල වැරදි කියවන ඔබ පෙන්වා දුන් අවස්ථා එමටයි. තවත් කෙනෙක් කියන්න පුළුවන් මේ මාතෘකා ටික විතරක් ඩ්‍රාෆ්ට් විදියට තියලා පසුව ඒවා ලියන්න. ඒකත් එක විදියකට හොඳයි. මම මේ කියන්න යන ක්‍රමයත් අන්න ඒ වගේ.

මේ විදියට හිතේ එක පාරටම පහළ වෙන අදහස වලට කියන්නේ "අහ් - අදහස්" කියලා. සිංහලෙන් මේක කිව්වට එච්චර ගතියක් නෑ වගේ "Ah ! Ideas" කියලා තමයි ශුද්ධ ඉංග්‍රීසියෙන් කියන්නේ. ඉතිං මේ වගේ අදහස් පහළ වෙනකොට ඔබ ඉන්නේ දුම්රියේ හෝ බස් රථයේ හිටගෙන වෙන්න පුළුවන්. නැතිනම් උදෑසන ඇහැරිලා ඇඳේ වැතිරිලා නිදි මත යනකම් සිටින පුංචි කාලයේ වෙන්න පුළුවන්. මේ වගේ අදහස් හැම තිස්සෙම ඇති වෙන්නේ නෑ.

එක් එක්කෙනාට වෙනස් වෙලාවල් වල මේවා ඇති වෙන්නේ. නමුත් පිළිගත්තා වෙලාව තමයි ඔබ නින්දෙන් අවධි වී,  ඇඳෙන් බැස ටිකක් එහා මෙහා පොඩි සක්මනක(කලුවරේම) යන අතරේදී මේවා ඇති වෙනවා කියන එක. මෙහෙම ඇති වෙන්නේ එක දවසකට එක අදහසක් කියන එක තමයි පිළිගැනීම. මෙහෙම ඇති වෙන අදහස් සටහන් කර තබා ගන්න ඔබ ළඟ තිබෙන්න ඕනේ කුඩා සටහන් පොතක්. දැන් අපේ අය අතින් ලියන්න බොහොම කම්මැලි බලව මම දන්නවා. ඉතිං තමන්ගේ ස්මාර්ට් ෆෝන් එක අරගෙන, එහෙමත් නැත්නම් ටැබ්ලට් එක අරගෙන කැමති විදියකට එහි සටහන් කර ගන්න. හැබැයි මගේ නම් වැඩි විශ්වාසයක් තියෙන්නේ කඩදාසිය ගැන තමයි. සමහරුන්ට මේ අදහස් එන්නේ උදේ ශරීරකෘත්‍ය සිදු කරන වෙලාවට කියලත් කියනවා. එතකොට කොයින්ද නෝට් පෑඩ් ? හැබැයි එතනින් පිට වුනු ගමන්ම සටහන්
කර ගන්නත් පුළුවන්. ඒත් ස්මාර්ට් ෆෝන් වගේ උපකරණ දැන් නාන කාමරයට ගෙනයන්න පුරුදු වූ අයත් ඉන්නවනේ.
ඇයි මේවට Ah ! Ideas කියන්නේ. ඇත්තටම මේවා ඇති වෙන ක්ෂණික ස්වභාවය නිසා තමයි මෙහෙම කියන්නේ. අපි හොය-හොය ඉන්න දෙයක් ගැන අදහසක් ඇති වුණොත්, අපේ කටින් ආහ් ! කියලා පිට වෙන්නේ නිතැතින්. මේකට භාෂාවේ ප්‍රශ්නයක් නෑ. කුමන භාෂාවක් හසුරුවන කෙනෙකුට වුණත් මේ වගේ අලුත් අදහසක් ඇතිවුණොත් පිට වෙන්නේ ඔය වචනේ තමයි.

මේ වගේ අදහස් ගලන එකත් හැමෝටම වෙන්නේ නෑ. එහෙම වෙන අය තමන් ගාව නිතර සටහන් පොතක් තබා  ගන්න එක වටිනවා. මොකද අදහස ආපු තැනදීම ලියා ගන්න. මේක බ්ලොග් ලිවිල්ලටම සීමා වුණු දෙයකුත් නෙවෙයි. තමන්ට කැමති ඕනෑම මාතෘකාවකට අයිති දේවල් මෙහෙම සටහන් කර ගන්න පුළුවන්. මේ අදහස මුලින්ම දැන ගන්න පුළුවන් වෙච්ච කාලේ නම් මමත් ඒ වගේ පිටුවක් පවත්වාගෙන ගියා. දැන් ආයෙත් එහෙම එකක් කරන්න කාලේ කියලා හිතෙනවා. 

තව දෙයක්, මෙහෙම හිතට එන අදහස් ඔක්කොම ලියලා අන්තිමට පොතක් පුරවන්න අදහස් තිබුණත්, එකක් වත් ක්‍රියාත්මක කලේ නැත්නම් ඉතිං වැඩක් නෑ. මට තේරෙන විදියට මෙහෙම උදේට අදහස් ගලාගෙන එන්නේ, ඔබ නින්දෙන් අවධි වෙන විට, ඔබේ මනස නිරවුල් නිසා. මේ වගේ අලුත් අදහස් ඇති වෙන්න මනසට විවේකයක් අවශ්‍යයි. 

ඉස්සන්, මගුරන්, ලොකු වැලිගොව්වන් ....

89/90 අඳුරු යුගය(Dark Era 89/90) ( 9 ) pinth ( 1 ) අතීත සොඳුරු මතක (Fond Memories / Nostalgic stuff) ( 12 ) අතීතකාමය (Nostalgia) ( 4 ) අනතුරු (Accidents) ( 1 ) අමතක වන්නට පෙර(Before Forget it ( 7 ) අවන්හල් (Restaurants) ( 4 ) ඇතුල් පැත්ත ( Inside Story ) ( 1 ) එළුපැටියාගේ කතා (Baby Goat Stories) ( 1 ) ඔබේම දෑතින් (Doo it yourself) ( 5 ) කළුතර මහා විද්‍යාලය ( Kalutara Maha Vidyalaya ) ( 4 ) කාළීන(Current Issues) ( 65 ) කුතුහලය(Curiosity) ( 70 ) කෙටි කතා (Short Stories) ( 1 ) ක්‍රිකට් (Cricket) ( 8 ) ක්‍රිකට්(Cricket) ( 32 ) ක්‍රීඩා(Sports) ( 19 ) ක්‍රෙඩිට් කාඩ්(Credit Cards) ( 8 ) ගණිත ගැටළු (Mathematical Problems) ( 4 ) ගමේ චරිත(My Villagers) ( 11 ) ගැටළු (Competitions) ( 2 ) ගීත ( Songs ) ( 2 ) ගෘහස්ථ කාරණා (Household Matters) ( 2 ) චිත්‍රපට(Movies) ( 3 ) ජීවන අත්දැකීම් ( Life Experience) ( 45 ) තාක්ෂණය(Technology) ( 18 ) දැකීම ( Observations ) ( 1 ) දැනුම(knowledge) ( 58 ) දේශපාළණ(Political) ( 14 ) නින්ද (Sleep) ( 2 ) නුවර එලිය ( Nuwara Eliya ) ( 1 ) පරිවර්තන (Translations) ( 32 ) පර්යේෂණ(Research) ( 16 ) පාපන්දු(Football) ( 14 ) පිටසක්වල ( Extra Terrestrial ) ( 1 ) පොත් (Books) ( 3 ) ප්‍රථමාධාර(First Aid) ( 1 ) බෙන්තොට (Bentota) ( 2 ) බෙන්තොට ක්‍රීඩා සමාජය(Bentota Sports Club) ( 3 ) බෙන්තොට බීච් හෝටලය ( Bentota Beach Hotel ) ( 1 ) මං සලකුණු ( Milestones ) ( 7 ) මගේ දුව(My Daughter) ( 11 ) මගේ පියා (My Father) ( 2 ) මගෝඩි වැඩ (Humours) ( 4 ) මට හමු වූ අමුතු චරිත Rediculous people I met ( 3 ) මට හමු වූ මිනිසුන් ( People I met ) ( 6 ) මහජන බැංකුව (People's Bank) ( 5 ) මා ලියු කවි ( My Poems ) ( 1 ) මොබයිල්(Mobile) ( 3 ) යෝජනා (Proposal) ( 1 ) රිවරිනා හෝටල් (Riverina Hotel) ( 3 ) රූපවාහිනී වෙළඳ දැන්වීම් ( TV Commercials ) ( 1 ) රෙඩ්බුල් කැම්පස් ක්‍රිකට්(Redbull Campus Cricket) ( 11 ) ලොල් කතා(Funny Stories) ( 55 ) විද්‍යා ප්‍රබන්ධ( Science Fiction ) ( 1 ) විනෝදාත්මක(Entertainment) ( 115 ) විවේචන(Critics) ( 56 ) ව්‍යායාම(Excercises) ( 3 ) සංචාරක(Travel) ( 24 ) සාකච්චා(Interview) ( 8 ) සුදීක(Sudeeka) ( 94 ) සෞඛ්‍යය( Health ) ( 2 ) හැඟුම්බර(Emotional) ( 43 ) හිරුආරක්ෂණ(Sun Protection) ( 2 ) ෆේස්බුක් (facebook) ( 1 )

මේවත් කියවා බලන්න

Related Posts Plugin for WordPress, Blogger...